Holiday sa Toledo hagbay ra

CEBU, Philippines — Hagbay ra nga dunay balaud nga nagdeklarar sa Enero 6 matag tuig nga special non-working holiday sa Dakbayan sa Toledo subay sa paghandum sa Charter Day anniversary.

Ang Republic Act No. 7254 napasar niadto pang tuig 1992 sa panahon ni kanhi presidente Corazon Aquino apan wala kini gihimo sa siyudad.

Kini nadiskubrehan dihang si Kongresista ug Deputy Speaker Pablo John Garcia gipangutana kung iya ba nga iduso pagbalik ang balaudnon nga unang giduso sa iyang igsoon nga si kanhi Deputy Speaker ug karon Gobernador Gwendolyn Garcia kinsa nahimong kongresista sa ikatulong distrito niadtong Hunyo 30, 2013 hangtud Hunyo 30, 2019.

Nunot niini si Konsehal Ricardo “Kuya Nick” Pepito niingon nga iya kining ipaabot sa Mayor ug sa konseho sa Dakbayan sa Toledo aron mapatuman ang balaud.

Si Pepito ang nangamahan sa resolusyon nga naghangyo kang Gwen sa pagduso og balaudnon nga magdeklarar sa Enero 6 nga special non-working holiday sa siyudad.

Ang R.A. No. 7254 gipirmahan ni Aquino niadtong Marso 20, 1992 sa panahon sab sa amahan sa mga Garcia nga si kanhi Deputy Speaker Pablo “Pabling” Garcia kinsa kongresista sa ikatulong distrito niadtong Hunyo 30, 1987 hangtud Hunyo 30, 1995.

Si Gwen kaduha niduso og balaudnon sa maong katuyoan ug ang ikaduha kaduso na unta sa Senado niadtong Hulyo 18, 2016 apan giingong wala aksiyoni tungod kay duna nay balaud.

Niadtong Hunyo Hunyo 19, 1960 nahimong siyudad ang Toledo pinasikad sa R.A. No. 2688 ubos sa paninguha ni kanhi kongresista Manuel A. Zosa.

Apan ang siyudad nagsaulog sa ilang charter day matag Enero 6.

Ang Toledo nahimo sab nga lungsod dihang si Gobernador Francis Burton Harrison nipirma sa Act No. 119 niadtong Disyembre 19, 1919.