Duha patay sa bangga

CEBU, Philippines — Duha patay sa managlahing aksidente sa kadalanan sa Probinsya sa Sugbo kagahapon sa buntag.  Ang unang disgrasya nahitabo sa Barangay Managgal sa lungsod sa Dalaguete nga niresulta sa kamatayon ni Alfredo Cedeño,67, taga Barangay Dumlog, Dakbayan sa Talisay.

Luwang hinuon ang kauban niini nga si Zozimo Belleza,64, nagpuyo usab sa maong lugar.  Matud ni Police Corporal Christoper Amadar sa Dalaguete Police Station paingon unta mamista sa lungsod sa Boljoon ang duha sakay sa motorsiklo nga gimaneho ni Cedeño gikan sa Dakbayan sa Talisay.

Dugang pa ni Amadar pagabot sa kurbadahong bahin sa dalan nawagtangan og kontrol si Cedeño tungod sa kakusog sa dagan niini.

Nalabay ang duha ug napantok ang ulo ni Cedeño hinungdan sa iyang kamatayon, samtang si Belleza nakaangkon og mga samad sa nawong bukton ug dali nga gidala sa tambalanan.

Samtang sa laing aksidente didto sa Barangay Cambang-ug Dakbayan sa Toldeo, namatay ang usa ka Rolando Canillo,46 , taga Barangay Tungkay sa maong dakbayan .

Gidala sa tambalanan ang nakabangga niini nga si John Labrador, 26, taga Barangay Loray 2 sa mao gihapong dakbayan ug ang iyang fiancee nga si Shery Velasquez,23 , taga Barangay Sirao, Dakbayan sa Sugbo.

Matud ni Police Staff Sergeant Celso Makidato , traffic investigator sa Toledo City Police Office paingon sa trabaho si Canillo ug gituohang paspas ang pagpadagan niini sa motor . Milihay kini og libaong samtang pasaka sa karsada  apan nitipas kini sa pikas nga lane hinugdan nga nagkabangaanay ang duha ka motorsiklo.

Nadala sa tambalanan sila Labrador ug Velasquez, samtang gideklarar nga dead on arrival si Canillo tungod sa grabeng kadaut sa ulo niini. (/IBM)(BANATNEWS)