Briton gidakop, duha ka menor na-rescue

CEBU, Philippines — Nasikop ang usa ka British National pinasikad sa warrant of arrest diha sa iyang condominium sa Barangay Hipodromo sa Dakbayan sa Sugbo.

Giila ang dinakpan nga si William Anthony Paul Becket, 61.  Matud ni Police Lieutenant Erlina Mayam hepe sa Women and Children Protection Desk (WCPD) Cebu City Police Office nakadawat sila og report gikan sa usa ka non- government organization may labot kang Becket nga manguha og mga batang lalaki ug dalhon sa iyang condo unit.

Dugang pa ni Mayam nga sukad niadtong 2018 pa nagpuyo si Becket ug adunay unom ka minor de edad nga dalhon sa iyang unit.

Atol sa operasyon depensa sa dinakpan nga igo ra siyang nitabang sa mga bata aron sa pagpaeskuyla ug siya tighatag og bawon ug uban pa nga panginahanglan sa bata.

Naabtan sa kapolisan nga way gisuot nga pang-ibabaw nga sinina ang duha ka bata nga na rescue. Ang duha nag edad og 16 anyos ug 6 anyos nga pulos batang lalaki.

Atol sa operasyon nabantayan ni Mayam nga nangluspad ang 16 anyos nga bata ug nagkurog ang 6 anyos. Gibutyag usab sa dinakpan nga adunay pagtugot gikan sa mga ginikanan ang mga bata nga abli ang pultahan nga pagadto sa unit sa langyaw.

Ang duha ka bata gidala sa Department of Social Welfare and Development (DSWD) aron ipaubos og stress debriefing. Sumala pa nga kapin usa ka tuig nang gi-monitor sa Womens and Children Protection Center Visayas Field Unit 7 (WCPC), City Investigation and Detection Management Branch (IDMB) ug WCPD sa CCPO si Becket. Nakuha sulod sa condo unit ni Becket ang laptop, personal computer, birth certificates sa mga bata, parents consents, mga cellophones, tablets ug uban pa.

Kasong kalapasan sa Republic Act 10364 kun Anti Human Trafficking in Persons si Becket samtang susihon pa sa kapolisan kung adunay tulobagon ang mga ginikanan sa biktima sa pagtugot sa langyaw pagsagop sa ilang mga anak.

Hinuon wala pa kaayo matino sa kapolisan kun may gihimong dautan ang langyaw sa duha ka bata. (/IBM)(BANATNEWS)