4 lechon stalls gipasirad-an
CEBU, Philippines — Upat ka tindahan og letson sa Dakbayan sa Carcar ang gipangunayan og pagpasirado ni Mayor Mercedita Apura sa kalapasan sa balaud ug kuwang nga mga rekisitos kagahapon sa hapon.
Bitbit ni Apura ang Executive Order No. 55 series of 2019 alang sa closure order sa tindahan nila sa Mercy Roel’s, Honeylette Navaja’s, Arlene Manreal’s ug Loreta Camanero’s Lechon.
Ang upat nahimutang sa Carcar City Public Market ug gikatahong daghang nangreklamo gumikan sa bahaw nga inasal, kuwang ang timbangan, dili maayo ang mga tindera, walay sanitary permit ug mayor’s permit.
Matud ni Apura nga gihatagan na og daghang pahimangno sa market administration ang maong mga tindahan apan wala lang nila patalinghugi.
Gitug-an ni Apura nga butangan na gyud nila og ngipon ang mga balaud sama sa city ordinance ug aduna na usab silay gipanday karon nga balaud diin ang masakpan adunay multa ug dakpon.
Si Apura nitug-an nga dili lang manindahay og letson ang iyang gipahimangnoan apan lakip na ang manindahay og isda ug karne.
Ang mayor nitug-an nga ang iyang gihimo warning kini sa mga malapason diin daghan na ang nilukat og permit nga mga manindahay.
Sumala pa ni Apura nga puslan man nga lapason sa mga tindera ang balaud iya gayud kining hugot na nga ipatuman. Ang pagpasira sa pipila ka tindahan resulta kini sa daghang reklamo ug kadtong nag-trending sa social media diin nasuko ang manindahay ngadto sa mga kustomer nga igo ra unta nangutana apan gipamugos sa mga manindahay kay naputos na ang tinagod nga letson. (/GMR)(BANATNEWS)
- Latest
