Aktibong polis ang gunman

CEBU, Philippines — Usa ka aktibong polis  ug usa ka retiradong polis ug usa ka sibilyan ang gitudlong mamumuno sa pag-ambush patay sa usa ka brodkaster sa Dakbayan sa Dumaguete sa Negros Oriental. Duha kanila ang nadakpan kagahapon.

Gibutyag ni Negros Oriental Provincial Police Office Police Colonel Julian Entoma nasikop na nila ang duha atol sa manhunt operation niadtong Huwebes sa hapon.

Giila ang mga dinakpan nga silang Teddy Reyes Salaw, 44, nga taga Brgy. Batinguel ug ang retiradong polis nga si Glenn Corsame nga taga Brgy. Banilad, Dakbayan sa Dumaguete.

Dugang pa ni Entoma nga pinaagi sa close circuit television (CCTV) footage natumbok dayon kun kinsa ang drayber sa sakyanan nga gisakyan sa gunman nga aktibong polis nga si Police Corporal Roger  Rubio.

“Sa atong mga CCTV footages sa na identify nato ang kining sakyanan una nga gigikanan sa triggerman kining Mitsubishi then continues ni ang atong pag follow-up until such time nga atong nabaw-an ang tag-iya. Then ang nagdala aning sakyanan then hangtod nga nakuha nato ning driver and at the same time iyang gitudlo ni nga maoy nag-drive aning Rubio kining si Glenn Corsame,“ matud pa ni Entoma sa Banat News.

Si Reyes maoy driver sa sakyanan nga Mitsubishi samtang si Retired Police Corporal Cosme ang driver sa motorsiklo nga gisakyan sa gunman nga si Rubio sa pagtira na kang Dindo Generoso nga brodkaster sa usa ka radio station sa maong siyudad.

Sumala pang Entoma, nga si Reyes sab maoy nagtumbok kang Rubio nga mao ang nagpusil sa biktima. Si Rubio sakop sa Provincial Mobile Force Company sa Negros Oriental.

Gi-surrender usab ni Cosme ang cellphone niya ngadto sa kapolisan ug nasuta nga adunay text gikan kang Rubio nga patyon si Generoso.

“Apil ni sa plano, kay atong makita sa ilang mga conversation nga sayo pa sa kaadlawon nag-communicate na sila sa police nato nga triggerman nga magpasugat then mao na pa spot-an ang subject nila,” dugang pa ni Entoma basi sa nakuha nga impormasyon sa cellphone ni Cosme.

Sa manhunt operation ilang giadto ang panimalay ni Rubio sa Dakbayan sa Guihulngan apan wala nila kini maabti ug ilang nasayran nga pila na ka adlaw kini wala mouli sa ila.

Gipa-report sa iyang mga labaw si Rubio apan wala na kini mo duty.

Sa pagkakaron wala pa matumbok kun unsay motibo sa pagpatay kang Generoso apan dunay tulo ka anggulo silang gitan-aw sama sa personal, trabaho isip komentarista ug away sa yuta.

Si Police Regional Office 7 Director Police Brigadier General Valeriano De Leon miingon pasakaan nila og kaso ang tulo.

Si Generoso gi-ambush diha sa Brgy. Piapi sa Dakbayan sa Dumaguete samtang kini paingon unta mag programa sa sibyaanan niadtong Huwebes sa buntag.  (/IBM)(BANATNEWS)