Pang ‘noche buena’ nimahal na
CEBU, Philippines — Nipagawas na og suggested retail prices sa mga gamit sa “noche buena” ang Department of Trade and Industry.
Gibutyag ni DTI-7 Senior Trade and Industry Development Specialist Dinah Gladys Oro nga subay sa pagpagawas sa SRP nagsugod na sila og monitor sa mga presyo.
Gipahibawo sab ni Oro nga sugod sa Lunes hangtud sa katapusang bahin sa Disyembre hingusgan na ang ilang monitoring.
Pipila sa noche buena items nga nisaka ang presyo mao ang local brand sa hamonada depende sa gidak-on ug klase sa ham diin naa sa 10 ngadto na 12 porsiyento ang pagsaka sa presyo.
Gawas sa ham nisaka sab ang presyo sa fruit cocktail bali og .55 ngadto sa tres porsiyento.
Ang mga sandwich spread, elbow ug salad macaroni, spaghetti sauce ug mayonnaise ang wala ra kaayoy paglihok sa presyo sukad sa 2018.
Nasuta nga dunay usa ka brand sa keso de bola ang nikunhod ang presyo og 5.24 ug 3.39 porsiyento samtang nikunhod sab ang presyo sa tomato sauce.
Sigun ni Oro nga kun dunay masakpan nga mamaligya og noche buena items nga lapas sa SRP mo-isyu sila og letter of inquiry sa dili pa mopagawas og show cause order.
Awhag ni Oro sa mga manindahay nga motuman gyud sa SRP ug sa mga kostumer kun sa ilang tan-aw mahal ang baligya katungod nila nga mopili og laing brand nga mas barato.
Samtang gipahibawo usab ni Oro nga wala nay mga pork ug pork-related products gikan sa luzon ang gibaligya sa Sugbo subay sa executive order ni Gob. Gwendolyn Garcia. Apan iyang gipasalig nga mohimo pa sila og subsob nga pagsusi sa tanang grocery stores ug merkado ilabi na nga nagkaduol na ang Pasko. (/GMR)(BANATNEWS)
- Latest
