Di cash ihatag sa mindanao

CEBU, Philippines – Dili mohatag ang kagamhanan sa Dakbayan sa Sugbo og pinansiyal nga tabang sa mga biktima sa 6.5 magnitude nga linog sa Mindanao.

Gibutyag ni Mayor Edgardo Labella nga ang P10 milyones nga pundo gamiton sa pagpalit sa mga labing gikinahanglan sa mga biktima.

Kini subay sa girekomendar sa assessment team nga gipangulohan ni Konsehal David Tumulak nga nibisita sa mga lugar nga apektado sa linog.

Ang tabang ipadala sa Magsaysay, Davao del Sur; Makilala, North Cotabao, ug Tulunan, North Cotabato nga giila sa assessment team nga labing grabe nga naapektahan nga mga lugar. Ang mga gikinahanglan mao ang laminated sacks, trapal, luna, pagkaon, relief goods, tubig, moskitero, banig, tambal, mga gamit sa pagluto, hygiene kits ug panapton.

Mopadala sab ang siyudad og mga sakyanan sama sa mga dump trucks, ambulansya ug mga tangke sa tubig.

"Dili nato langanon. Time is of the essence. We can have these goods that they really badly need be brought to them as soon as possible," matud ni Labella. Ang hinabang gitakda nga ipadala sa Mindanao karong adlawa.

Si Labella kauban sila si Konsehal  Tumulak, Donaldo Hontiveros, Prisca Niña Mabatid, pipila ka department heads ug mga doktor ang mobisita sa tulo ka apektadong lugar sa Sabado.

Samtang ang konseho sa Dakbayan sa Mandaue ang nipahigayon og special session kagahapon aron pag-aprobar sa P8 milyones nga tabang sa mga apektado sa linog nga mga lugar sa Mindanao.

Gitinguha sab sa konseho sa Dakbayan sa Mandaue nga mpasusi ang mga taytayan nga naglakip sa duha nga nagdugtong sa Dakbayan sa Lapu-Lapu sa pagsuta sa kalig-on batok sa linog.

Si Konsehal Jimmy Lumapas, chairman sa committee on transportation sa konseho sa dakbayan, sa iyang giduso nga resolusyon nag-awhag sa Department of Public Works and Highways ug City Engineering nga mopahigayon sa ilang joint inspection.

Naglakip sa mga taytayan nga gitinguha ni Lumapas nga mahimoan og joint inspection mao ang Mactan-Mandaue Bridge, Marcelo Fernan Bridge, Butuanon Bridge, Cansaga Bay Bridge ingon man ang Subangdaku Bridge.

Sa pikas bahin giangkon sa pangulo sa Talisay City Disaster Risk Reduction and Management Office nga dakung hagit ang dili matag-an nga katalagman sama sa linog. Kini bisan sa ilang paningkamot nga mapaubos sa training ug seminar ang katawhan panahon nga moigo ang linog. Si Alvin Santillana nibutyag nga matag kwarter aduna gyud silay earthquake drill sa nagkalain-laing establisemento, tunghaan ug uban pa.

Apan iyang gibutyag nga dili gyud gihapon kalikayan nga adunay mga tawo nga malisang sa panghitabo ug maoy hinungdan nga madisgrasya.

Karong Nobiyembre 14 maghimo sila og halapad nga earthquake drill diin sila maoy napili sa Rehiyon 7 nga pilot city. (/GMR)(BANAT NEWS)