Construction worker ‘suspek’ sa lungkab sa pawnshop

CEBU, Philippines – Aduna nay person of interest ang Waterfront Police Station sa nilungkab sa usa ka pawnshop sa dalan Colon, Dakbayan sa Sugbo niadtong Lunes.

Kini maoy gibutyag ni Waterfront Police Station chief, Police Major Jomar Pomarejos, human nga adunay closed circuit television (CCTV) camera nga nakuha ang kapolisan.

Dugang pa ni Pomarejos nga usa ka notadong manglungkabay ang ilang gitan-aw karon nga POI kun diin usa kini ka construction worker.

Hinoon dili pa nila matudlo tungod kay dili kaayo klaro ang CCTV footage nga gikuptan sa kapolisan apan ila pa kini ipa-enhance.

Samtang si Police Major Clark Arriola, ang tigpamaba sa Cebu City Police Office, nagkanayon nga gawas sa CCTV footage aduna sab silay T-shirt nga nakuha ug duda sa kapolisan nga gipanag-iya kini sa nanglungkab.

Dugang pa ni Arriola nga nitabang na usab pag-imbestigar ang City Investigation and Detection Management Branch (IDMB) aron sa paspas nga dagan sa imbestigasyon.

Nakuha sa iladong pawnshop nga gilungkab ang usa ka laptop, cellphones ug kwarta nga gibana-bana nga mobalor og P300 mil. (/GMR)(BANAT NEWS)