Manindahay og lechon sa Carcar gisaway sa FB

CEBU, Philippines – Napuno karon og pagsaway ang pipila ka tindahan sa lechon baboy diha sa Dakbayan sa Carcar tungod sa insidente nga giingong gipugos og papalit ang kustomer nga nianha sa lugar nga buot untang mamili og lechon.

Base sa post ni Jesrel Villas sa iyang facebook account niadtong Nobiyembre 2, 2019 gipadayag niini ang ilang kasinatian sa usa ka tindahan sa lechon diha sa Carcar.

Matud ni Villas nga siya ug ang iyang kauban padulong sa Habagatang Sugbo ug nihapit diha sa Carcar aron mopalit og lechon baboy.

Apan dihang mosuroy unta sila sa mga tindahan aron makapamili og lechon gialihan sila sa mga tindera sa “Mercy Roel Lechon”. Ug dihang nangutana sila sa presyo sa lechon nakugang na lang sila tungod kay giputos na dayon ang lechon ug gidala sa ilang sakyanan nga wala pa man sila magkasbot ug mosanong.

Ug dihang nireklamo sila giingong nisulti kanila ang tindera nga maoy moestorya sa iyang amo tungod kay nasuko kini. Ang kampo ni Villas giingong buot untang makig-estorya sa tag-iya nga lalaki apan nagyawyaw kini ug nanghagit og sukmagay.

Ang maong post ni Villas sa oras sa pagsuwat niining balita niabot na sa 13,000 ang reactions.

Gumikan sa maong hitabo, Si Mayor Mercidita Apura nipatawag og tigom sa mga tindera ug tag-iya og litsonan sa dakbayan.

“Ako naluoy ko ninyo, kay kamo ra’y gapatay sa inyong negosyo. Nahiubos ko ninyo sa inyong pagpakauwaw dili lang nako but sa tanang Carcaranon”, base sa post sa facebook page sa LGU Carcar kagahapon.

Si Candice Acuña, information officer sa siyudad nagkanayon nga nimando na og imbestigasyon ang mayor kalabot sa maong insidente. (/BDB)(BANAT NEWS)