LTFRB-7 gidayeg sa chairman
CEBU, Philippines — Nakadayeg si Land Transportation Franchising and Regulatory Board Chairman, Atty. Martin Delgra, sa kapaspas nga gihimo sa LTFRB-7 aron mapadayon ang ilang operasyon bisan sa nahitabong sunog sa ilang rehiyonal nga buhatan.
Kahinumduman nga adlaw’ng Domingo nahitabo ang sunog ug asoy ni Delgra nga pagka Lunes gihan-ay ni LTFRB-7 Director Eduardo Montealto Jr. ang kinahanglan buhaton aron makabalhin og lugar.
“Bisan pa man nasinati nato nga dili nato gidamgo apan abtik gihapon kun sa English pa we rose from the ashes and then we were able to service them,” asoy ni Delgra.
Nibisita si Delgra sa Sugbo aron sutaon gikan sa mga kliyente sa ahensiya kun unsa kadugay ug kahinay ang transaksiyon.
Matud pa nga nakasabot ang mga kliyente sa LTFRB-7 nga mohinay gamay ang serbisyo tungod sa nahitabo sa rehiyonal nga buhatan apan si Delgra niklaro nga dili kini himoong rason nga mohinay ang serbisyo sa LTFRB.
“Abi nako’g it will take them a while to recover or set up a new and yet temporary office but natukod man dayon ni RD Montealto notwithstanding the fact nga ako ning PUV Road Show Caravan nagsugod nata didto sa Region 6 unya ugma magsugod na pud ta sa Region 7 so akong pasabot ang preparasyon sa Region 7 ilawom ni RD Montealto bisan pa og naay nahitabo diri sa opisina nagsige gihapon ta og padayon sa pagpreparar niining atong road show carvan,” dugang ni Delgra.
Gipahibawo sab ni Delgra nga gisusi niya ang nagpadayon nga pag-ugmad sa bag-ong building sa LTFRB-7 sa may dalan Echavez, Siyudad sa Sugbo.
Malipayon si Delgra nga paspas ang trabaho sa maong building.
Si Montealto sa iyang bahin nagpasalamat kang Delgra nga wala gyud sila pasagdi sa nahitabo nila. GMR (BANATNEWS)
- Latest
