Mga law students nitabang sa nanguha og bar exams

CEBU, Philippines — Hugot nga seguridad ang gipatuman sa kapolisan sa National Capital Region Regional Police Office (NCRPO) sa unang Domingo sa Bar Exam nga gipahigayon sa University of Santo Tomas (UST) sa kaulohan.

Pipila ka law students gikan sa nagkalain-laing unibersidad sa Sugbo ang nitambong ug nitabang isip suporta sa mga barista nga mokuha sa ilang pangandoy isip abogado.

Si Atty. Mae Ellaine Bathan, assistant dean sa University of San Jose-Recoletos, kinsa maoy nitabang sa pag-asister sa mga barrister nagkanayon nga Nobiyembre 1 pa lang nangabot na ang mga volunteers law students aron motabang sa pagpangandam sa mga barristers lakip na niini ang mga volunteers Josenian lawyers ug mga professor kun diin adunay last minute discussion nga gipahigayon.

Dugang pa ni Bathan nga daku ang iyang kompiyansa nga ubay-ubay nga taga USJR ang mopasar tungod sa pagkahaum sa mga discussion ang nigawas.

Kini base sa gipahigayon nga annual meeting usab sa mga deans sa tanan law schools sa nasud.

Gibanabana nga anaa sa 120 ka barristers ang nikuha sa exam gikan sa USJR.

Si NCRPO Director Police Brigadier General Debold Sinas nangunay usab sa pag-inspeksyon sa lugar aron sa pagseguro nga nahisubay ug hugot ang seguridad.

Gawas sa kapolisan adunay mga K9 dogs ang gipakatap palibot sa UST, may mga bombero, armadong kusog sa nasud ug uban pa.

Hinoon walay natala nga kagubot sa unang adlaw sa exam kun diin Political Law ug Labor Law ang unang duha ka subjects ang gikuha kagahapon.

Aduna pay tulo ka Domingo ang nahabilin aron mahuman na ang Bar Exam.

Lain-laing organization, fraternities, sororities, professor gikan sa laing-lain dapit sa nasud ang nitambong isip suporta ngadto sa mga barrista. (/GMR)(BANATNEWS)