Dugang supply sa tubig gituki sa MCWD ug Lapu-Lapu City
CEBU, Philippines — Nakigkita ang mga opisyal sa Dakbayan sa Lapu-Lapu sa mga representante sa Metropolitan Cebu Water District aron tukion ang mga detalye bahin sa gisugyot nga pagsuplay og tubig gikan sa tukorong desalination plant diha sa maong siyudad nga gipanglantawang makatabang sa nagnihit nga suplay sa tubig karon.
Giimbitar ni Lapulapu City Mayor Junard Chan ang MCWD officials pinangulohan ni OIC General Manager Jorge Gabriente, aron tukion ang plano sa MCWD ug kung asa makatabang ang siyudad.
Sumala pa ni Chan suportahan nila ang mga tinguha sa MCWD nga pagpangita og kasulbaran sa problema.
Sa pamahayag ni Gabriente, kini miingon nga dunay upat ka mga tinubdan sa tubig nga makuhaan ang MCWD diha sa Lapu-lapu City ug sa Cordova. Hinuon giisip lang kini nga medium-term solutions tungod kay pangsapar-sapar lang ang makuhang tubig didto sa kuwang.
Pagkakaron, nagkinahanglan og 500,000 cubic meters nga tubig matag adlaw ang Metro Cebu. Apan ang MCWD maka-supply lang og tubig nga 238,000 cubic meters kada adlaw hinungdan nga dunay mga dapit nga hinay ang pressure sa tubig ug duna say wala maong girasyonan nalang kini.
Gusto sa MCWD nga ipaagi sa bidding ang kontrata sanglit gobiyerno ug gikontrol sa gobiyerno ang ilang kompanya.
Matud pa nga kinahanglan gyud nga ipaagi kini sa bidding aron masayran kun asa ang mas barato ug matuki ang kasabotan mahitungod sa supply tali sa siyudad ug sa MCWD.
“MCWD will then compute an adjustment to the water rates that the consumers need to be informed about and when it will be implemented,” ang pamahayag sa MCWD nagkanayon.
Niadtong Oktubre 22, 2019, si Chan uban sa mga representante sa CitiCore Summa Water nipirma og memorandum of agreement alang sa duha ka tukorong desalination plants niini diha sa maong siyudad sud sa 18 ka buwan.
Matud pa nga sa pagkakaron bisan 20,000 cubic meters matag adlaw nga dugang tubig ang mapuno makatabang na og dako ilabi na sa mga konsumidor nga naa sa kinatumyang sa ilang distribution pipes. (/IBM)(BANATNEWS)
- Latest
