Fall Army Worms niigo sa 13 ka lungsod sa CV

CEBU, Philippines — Gi-monitor sa Department of Agriculture ang mga umahan sa Central Visayas kun wala ba kini giatake sa mga peste. Miasoy si Dr. Bienvinido Acabal, pangulo sa Regional Crop Protection Center(RCPC) sa DA-7 padayon ang ilang monitoring matag semana sanglit gi-require sab sila sa ilang ulohang buhatan nga kada Huwebes magpadala sila og data hinungdan ang ilang mga staff karon duna say provincial monitoring.

Sa 25 ka lugar nga ilang na-survey niadtong buwan sa Septiyembre, 13 ka lungsod sa Central Visayas ang apektado o positibo sa fall army worm, hinoon dili ra alarming ang danyos niini.

Ang mga lungsod nga positibo sa fall army worm naglangkob sa Sogod, Madridejos, Bantayan, Santander, Samboan ug Ginatilan sa Cebu; Sagbayan ug Sevilla sa Bohol; Maria, San Juan ug Lazi sa Siquijor; ug Zamboangita ug Mabinay sa Negros Oriental.

“In terms of damage walay problema manageable ra ang iyang level kay mawala raman after sometime. So upat ka lungsod pa among giadto sa Negros Oriental pero atong quarantine karon sa Negros Oriental nag town to town sila wala lang mi makakuha sa ilang data kay kining among data base gyud ni mismo sa among nakuha karon”, asoy ni Dr. Acabal. Giawhag nila ang mga mag-uuma nga ipadayon ang monitoring dungan sa pagbutyag nga kun dunay makit-an nga fall army worm pwede ra kining puniton kay dili kini kahadlokan ug dili balhiboon maong dili katol.

Duna sab sila’y giandam nga kemikals nga ihatag sa mga mag-uuma kun pananglitan mag outbreak.

“Naa pud tay nakita nga observation nga di siya kadaghan sa ato karon probably naay mga langgam mangaon sa iyang pagkaulod ug ubang ang amigo natong organisms naa sa field nga nagtuyok-tuyok dili siya maabot og level nga mag-outbreak”, dugang ni Acabal.

Sigon ni Acabal sa usa sa  maka trigger sa pagtumaw niining fall army worm kining taas nga huwaw.( IBM)(BANATNEWS)