Kapitolyo nanawat og hinabang; PCG nihatud sa mga hinabang

CEBU, Philippines — Ang Probinsiya sa Sugbo nipasiugda kini og disaster relief campaign alang sa mga biktima sa linog didto sa Mindanao.

Ang Provincial Disaster Risk Reduction and Management Office ug ang Provincial Social Welfare and Development Office nagkauyon sa pagbutang og receiving area o drop off-point alang sa mga donasyon sa mga Sugboanon nga buot motabang sa mga biktima sa linog ngadto sa Mindanao.

Ang maong relief operations gitawag kini og "Sugbo Alang Sa Mindanao (Oplan Tabang Mindanao gikan sa mga Sugbuanon).

Ang umaabot nga hepe sa PDRRMO nga si Neil Sanchez nagkanayon nga ang labing kinahanglan sa pagkakaron sa mga taga Mindanao mao ang tubig, habol, food items sama sa mga delata nga dili dayon madaot.

Nagpaabot pa usab karon ang Kapitolyo gikan sa counterparts niini sa Mindanao aron mahibaw-an ang specific items ang gikinahanglan sa mga biktima.

Ang Kapitolyo nagsugod na kini sa pagpanadawat og donasyon kagahapon diin ang drop-off point diha sa basketball court sa Kapitolyo.

Sa laing bahin, niadtong Biyernes sa gabii duha ka sakyanan ang nibiya nga adunay karga nga mga relief good sa headquarters sa Philippine Coast Guard Central Visayas paingon sa Cagayan De Oro City sakay sa MV Lite Ferry 18.

Kahinumduman nga ang Philippine Coast Guard (PCG)-7 nanawat og mga hinabang aron ipadala ngadto sa Mindanao nga naigo sa kusog nga linog diin daghang kabalayaan, estraktura ug uban pa ang naapektohan.

Gisakay sa Hyundai truck sa PCG ang 2,400 ka botilyang mineral water laing 3,954 ka botilyang mineral water ang gisakay sa M35 truck sa PCG lakip ang 423 ka food packs, 57 kabuok canvass o trapal ug 65 kabuok nga mosquito net.

Samtang ang second batch sa relief goods alang sa Mindanao gipadala usab kagahapon diin ang  Department of Social Welfare and Development(DSWD) ingon man ang Nature Spring ug Philippine Coast Guard District Central Visayas nihatud og relief goods diha sa Multi-Role Response Vessel (MRRV) 4406.

Ang mga gihatud nga relief goods naglangkub sa 54,100 ka lata sa sardinas, walo ka trapal, 5,040 ka bottled mineral water, 26,720 ka malong ug 1000 ka box sa sleeping kit.

Nasayran usab nga dunay third batch sa relief operations alang gihapon sa Mindanao. (BDB)(BANATNEWS)