93-1 gituki sa Probinsiya ug Dakbayan sa Sugbo

CEBU, Philippines — Ang Lalawigan sa Sugbo bukas kini alang sa renegotiations sa mga parameter sa land swap deal tali sa Dakbayan sa Sugbo.

Si Gobernador Gwendolyn Garcia nikompirma nga nakigtagbo siya sa mga representante sa kagamhanan sa Dakbayan sa Sugbo niadtong Oktubre 28, 2019 aron hisgutan ang pipila ka mga punto sa Ordinance 93-1.

Ang maong ordinansa kabahin kini sa land swap deal tali sa Lalawigan sa Sugbo ug Dakbayan sa Sugbo sa 32 ka ektarya nga luna nga gipanag-iya sa probinsiya.

Ang maong luna nga nahimutang sa Dakbayan sa Sugbo giukopahan kini sa 4,000 ka pamilya.

Ang luna nga ihulip sa Dakbayan sa Sugbo mao ang Block 27, Block 27A, Block 27B nga adunay gilapdon nga 3.3 ektarya; 13,711 square meters nga nahimutangan sa Sewage Treatment Plant; 2,476 square meters nga nahimutangan sa city abattoir; 2.5 ektarya nga luna diha sa South Road Properties ug siyam ka ektarya nga luna nga nahimutang sa Barangay Pulpogan, Lungsod sa Consolacion.

Gibutyag ni Garcia nga ang duha ka Local Government Units nagkasabot nga hisgutan ang mga butang nga naglambigit sa maong land swap deal.

Naglakip kini sa Deed of Donation and Acceptance sa habig sa Lalawigan sa Sugbo ug ang Sangguniang Panlungsod Ordinance sa habig sa Dakbayan sa Sugbo.

Ang Lalawigan sa Sugbo bukas sa mga renegotiation sa maong land swap deal.

"Certain issues have to be resolved but of course, we are always open to renegotiation”, matud ni Garcia.

Dugang ni Garcia nga gihuwat na lang niya ang kasabutan tali sa mga beneficiary sa maong luna. (BDB)(BANATNEWS)