DPS: Mas daghang basura karong tuiga sa mga sementeryo
CEBU, Philippines — Mga basura nga nakolekta gikan sa mga sementeryo sa Dakbayan sa Sugbo mas daghan karong tuiga kompara sa nilabay’ng tuig matud sa Department of Public Services (DPS).
Si Engineer Joel Biton, hepe sa DPS nagkanayon sugod niadtong Oktubre 28 nagpahigayon sila og pagpanglimpiyo diha sa sementeryo.
Matud ni Biton nga niadtong Oktubre 31 naglisod sila sa pagsulod ug pagkolekta sa mga basura sa mga sementeryo tungod sa pagdagsa sa mga tawo.
Sa sementeryo sa Cabantan imbes nga garbage truck ang mohakot sa mga basura tungod sa kahuot sa pagdagsa sa mga tawo ang DPS nagdestino kini og unom ka traysikol aron mangolekta sa mga sinakong basura nga gitapok sa mga metro-aide.
“Mas grabe ang mga tawo karon, mao sab nga mas daghan ang basura”, matud ni Biton.
Ang DPS nagbutang kini og mga basurahan sa matag sementeryo aron ang mga tawo dili kini magpataka og labay sa ilang mga basura.
“Para nako dili gyud effective ang mga trash bins, kay magpataka man gihapon og labay ang mga tawo. Unya sa kadaghan sa basura matabonan ang mga trash bins”, butyag ni Biton.
Gilauman sa DPS nga karong adlawa hapsay na ang paglimpiyo sa mga sementeryo ug dali na ang pagkolekta sa mga basura tungod kay gilauman nga gamay na lang ang mga tawo.
Ang DPS nagbutang usab kini og mga personnel nga magbantay sa mga lugar nga hotspot aron madakpan ang mga magpataka og labay sa ilang basura.
Gibutyag ni Biton nga ubay-ubay ang nasikop karong tuiga nga nagpataka og labay sa ilang basura ug nagpataka og pangihi. (BDB)(BANATNEWS)
- Latest
