100 gun owners sa Talisay paso na ang lisensya

CEBU, Philippines — Moabot sa kapin ug kulang 100 ka indibidwal nga nagtrabaho sa gobiyerno sa Dakbayan sa Talisay ang adunay armas nga ang mga lisensya paso na sumala pa sa hepe sa kapolisan sa siyudad Police Major Gerard Ace Pelare.

Gipasabot hinuon ni Pelare nga matinumanon sa balaud ang maong mga kawani apan  gipahibalo niya kini isip pasidaan nga kinahanglan nilang ipa-renew ang mga lisensya sa maong mga armas aron dili sila mag-atubang og kaso.

“Mga law abiding-citizen ni sila pero nagtuo ko nga nalimot o ba kaha wala pay panahon sa pagproseso sa dokumento sa ilang armas,” nagkanayon si Pelare.

Hinuon iyang gihangyo ang tanan nga dunay armas nga expired na ang mga lisensya ug dili pa nila malihok ang pag-renew o ba kaha dili na sila gustong magtinil niini sa pagtahan sa maong mga armas.

Kinahanglan sab nilang i-surrender daan ang armas  samtang gihikay pa ilang pag-renew sa lisensya ug makuha kini og balik kun kompleto na ang dokumento sa ilang armas.

Sa pagkakaron, duna nay 30 ka mga armas nga gideposito diha sa ilang buhatan. (IBM)(BANATNEWS)