Napulo sa prisohan nagkalag-kalag
CEBU, Philippines — Napulo ka tawo ang nangadakpan ug sa prisohan nagkalag-kalag tungod sa pagpamaligya og illegal nga drugas niadtong Sabado sa gabii.
Sa buy-bust operation sa San Nicolas Police Station pinangulohan ni Police Major Kenneth Paul Albotra sa Conception St. Brgy. Suba Cebu City nadakpan silang Niño Luces Salas, 24, nga maoy target sa operasyon, ug mga kaubanang sila si Judell Adellopher Delos Santos, 21; Ronald Bryan Buendia Delos Santos, 38, Alfie Cabansay Añana, 38.
Kapin sa semanang gibantayan ang mga kalihokan ni Salas hangtud nga gilusad ang operasyon sa miaging gabii nga diin kusog ang halin sa drugas tungod sa okasyon sa kalagkalag.
Dugang pa ni Albotra nga si Salas anaa sa Drug watchlist Regional Level nga gikatahong High Value Target (HVT).
Nakuha sa mga dinakpan ang 100 gramos sa gidudahang shabu nga mobalor og P680,000.
Sa Dakbayan sa Talisay, nadakpan diha sa Sitio Mananga 2, Barangay Tabunok Biyernes sa gabii silang Mike Glenn Aniñon Canillo, 33; Juvenson Reponte Alforque, 33; ug si Ferdinand Espinosa Galeos, 35.
Usa ka nagpakabanang molupyo ang mitawag sa kapulisan human iyang nakita ang tulo nga kadudahan ang mga lihok. Sa pag-abot sa mga polis nakita nila ang tulo nga daw dunay gibitbit.
Sa ilang pagrekisa nakuhaan sila og walo ka gagmay’ng paketeng gidudahang shabu.
Gituohan nga manuyop daan ang mga dinakpan aron makalahutay sa pagbuntagay sa sementeryo. Apan sa prisohan hinuon nila saulogon ang kalag- kalag.
Samtang sa operasyon sa Cordova, nasakmit ang P103,402 nga kantidad nga gituohang shabu gikan sa tulo ka mga gidudahang tigpayuhot niini sa diha sa Sitio Bliss, Barangay Ibabao.
Ang mga nadakpan mao sila si Joefry Ursal Bentulan, 30; Kurt Russel Echavez Calica, 27; ug Raul Sumalinog Bentulan, 41.
Si Cordova Acting Chief of Police, Police Lieutenant Jan Ace Elicid Layug miingon nga dunay nagsumbong kanila bahin sa modus sa tulo hinungdan sa gilusad nilang operasyon.
Nasakmit gikan sa tulo ang 15.21 gramong gidudahang shabu.
Ang maong mga dinakpan pasakaan og kaso ugmang adlawa tungod sa paglapas sa Sec. 5 ug 11, Art. II sa Republic Act 9165 o Comprehensive Dangerous Drug Act of 2002. (IBM)(BANATNEWS)
- Latest