Laing sakyanan nilayat sa SRP
CEBU, Philippines — Lain na sab nga disgrasya ang nahitabo sa South Road Properties (SRP) duol sa Talisay City Fish Port sa Barangay San Roque, kagahapon sa udto.
Pulos nalandig sa tambalanan ang duha ka drayber sa mga sakyanan nga nagbangga nga sila si Kieth Riche Tecson, 37-anyos nga taga Barangay Lawaan 3 sa maong siyudad ug si Charlieston Cedeño, hingkod.
Si Jonathan Tumulak, hepe sa trapiko sa siyudad, nagkanayon nga nakahigayon pa siya sa pagkighinabi ni Tecson samtang gihinay-hinay kini og kuha sa iyang sakyanan nga napiyapi. Matud pa niya nga si Tecson gikan sa Siyudad sa Sugbo ug paingon na unta nga mopauli sa ila.
Apan pag-abot niya sa maong lugar kalit nga adunay nibaraw sa iyang panan-aw nga wala niya nasabti kung unsa.
Sa iyang pagkamatngon nisaka na ang usa niya ka ligid sa center island hangtud nga nibangga sa awto nga gimaneho ni Cedeño.
Si Patrolman Aries Arao-arao sa Talisay City Traffic Division nitataw nga ila una nga gi-hold ang duha ka lisensya sa duha ka drayber samtang padayon pa ang duha sa pagpaalim sa tambalanan.
Hinoon magdepende kini sa duha ka partido kun ila nalang ba kini nga husayon ang panghitabo. Niadtong Oktubre 14 usa ka kinabuhi ang nakalas diha gihapon sa maong dapit human niambak sa center island ang awto. Nakapangutana ang daghang netizens kun unsa gyud ang naa dihang dapita kun nganong daghan man ang nadisgrasya. (GMR)(BANATNEWS)
- Latest
