NBI magsugod na sa imbestigasyon
CEBU, Philippines — Sugdan na sa National Bureau of Investigation ang imbestigasyon sa pagbanhig patay kang Clarin, Misamis Occidental Mayor David Navarro.
Matud ni NBI-7 Regional Director, Atty. Tomas Enrile, nga magsugod sila sa uno sanglit gi-turn over na ang tanan nga ebidensya sa kapolisan.
Dugang pa ni Enrile nga makig-alayan sila sa laing ahensya aron makatabang sa imbestigasyon.
Matud ni Enrile nga ilang ipatawag ang mga police escorts nga kuyog sa patrol car atol sa insidente.
Ang NBI ang gitahasan ni Presidente Rodrigo Duterte nga mohimo sa imbestigasyon sa pagtuo nga polis ang nagpaluyo sa kamatayon sa mayor.
Dugang ni Enrile nga ilang susihon ang tanan bahin sa kinabuhi ni Navarro lakip ang mga alegasyon nga giatubang uban usab sa mga hulga.
Tinguha karon nila ni Enrile nga masusi ang kuha sa CCTV footage aron ilang makita ang mga tawo nga nagpaluyo sa pagpatay sa mayor lakip ang gisakyan niini sa pagsibat. Nanawagan usab si Enrile sa mga nakasaksi sa pagdangop sa ilang buhatan aron makatabang sa imbestigasyon.
Si Enrile nitug-an nga andam sila makig-alayon sa Commission on Human Rights may kalabutan sa imbestigasyon sa kamatayon ni Navarro apan molanat una kini og panahon ilabi na ang mga dokumento pabilin pa kini nga confidential samtang magpadayon ang imbestigasyon.
Sa pikas bahin blangko pa ang kapolisan sa pag-ila sa mga armadong lalaki nga nisuway unta sa pagpatay sa usa ka branch manager sa usa ka security agency sa Sitio Hawaiian, Marigondon, Dakbayan sa Lapu-Lapu.
Si Police Major Juan Capacio, hepe sa Presinto 3 sa Lapu-Lapu City Police Office, niingon nga naglakip karon sa mga anggulo nga gisubay sa mga imbestigador ang kalambigitan sa real estate business sa biktima nga si Demetrio Torreon, 62, taga San Carlos Village, Marigondon kinsa giinging adunay gikasungi nga naglambigit sa yuta. (GMR)(BANATNEWS)
- Latest
