MCPO andam na sa kalag-kalag

CEBU, Philippines — Bantayan 24-oras sa kapolisan sa Dakbayan sa Mandaue ang mga sementeryo, pantalan ug bus terminal nga ubos sa ilang hurisdiksyon atol sa kalag-kalag.

Kapin sa 200 ka polis ug kapin usab sa 200 ka force multipliersang mobantay aron paghatag og igong seguridad atol sa okasyon sa Nobiyembre 1 ug 2.

Kini ang gipadayag ni Police Colonel Jonathan Abella, direktor sa Mandaue City Police Office, nunot sa pagpakigtagbo niya sa mga representante sa buhatan sa trapiko, City Disaster Risk Reduction and Management Office, mga opisyal sa barangay ug ingon man sa Bureau of Fire Protection (BFP) diin ilang gituki ang pagpangandam sa All Saints’ ug All Souls’ Day niadtong niaging adlaw.

Matud niya nga ang kapin sa 200 ka polis ug kapin sa 200 ka force multipliers ang ipangdestino sa nagkalainlaing lugar nga nagkinahanglan og seguridad diin maoy dapit nga tapukan sa daghang mga tawo nga naglakip na sa mga sementeryo sama sa Catholic Cemetery, ManPark, Grosmar ug ingon man ang Municipal Cemetery nga nahimutang sa Barangay Guizo.

Gihisgutan sab ni Abella ang uban pa nga mga sementeryo nga nahimutang sa Barangay Pagsabungan, Jagobiao, Angelicum sa Barangay Canduman ug ingon man ang tipik nga lugar sa Cempark sa Barangay Banilad nga nahisakop sa Dakbayan sa Mandaue.

“We will be putting up ‘Police Assistance Desks’ in cemeteries and bus terminals for the public to have easier access in case they need police assistance and to deter crimes,” matud ni Abella.

Dugang pa niya nga makiglambigit usab ang buhatan sa kapolisan sa uban nga mga buhatan nga adunay kaakuhan sa pagbantay sa maong adlaw nga naglakip sa Traffic, CDRRMO, BFP ug ingon man ang Armed Forces of the Philippines (AFP).

Giawhag usab ni Abella ang katawhan nga atol sa maong adlaw sa kasaulogan labing mahinungdanon usab sila nga magmabinantayon ilabi na gyud sa mga dapit nga daghan ang mga tawo nga magtapok pinaagi sa pagpaniid usab sa mga tawo nga katahapan ang mga lihok ug ang pagtaho dayon ngadto sa kapolisan.

Nunot niini iyang gipahimangnoan ang mga nagdumala sa sementeryo alang sa higpit nga pagdili sa mga tawo nga magdala og hait nga hinagiban sa paglikay sa dautan nga panghitabo sa maong adlaw sa kasaulogan. (/GMR)(BANATNEWS)