Bag-ong modus sa investment scam gi-monitor
Cebu, Philippines — Naalarma ang Criminal Investigation and Detection Group sa bag-o nga paagi sa pagpangilad sa mga investment company.
Kini ang gibutyag sa CIDG-Mandaue Field Unit chief, Police Major Edwin Lacostales, human nireklamo ang duha ka biktima sa pagpangilad niadtong Huwebes.
Matud ni Lacostales nga tungod sa subsob nga pag-monitor nila sa mga illegal investment schemes sa Central Visayas ug pagpasirado sa mga opisina niini, adunay bag-ong modus pinaagi sa paggamit sa social media.
Nunot niini nipahimango ang kapolisan nga dili basta-basta motuo sa mga nindot nga pasalig sa bisan kinsa nga ahente nga magpaila kung pasaligan nga dinagko nga interest ang mabalik sa buot mo-invest.
Dugang ni Lacostales nga isegurado nga ang apilan nga investment company rehistrado sa Securities and Exchange Commission nga gitahasan nga mag-regulate ug magkupot sa mga listahan sa mga legal nga kompaniya lakip na niini ang mga investment company.
Sa pagkakaron padayon pa nga gi-monitor sa kapolisan ang bag-ong modus sa pagpangilad. GMR ( BANAT NEWS)
- Latest