Nag-sex ibabaw sa nitso nag-trending

CEBU, Philippines — Nag-trending karon ang usa ka video diha sa social media bahin sa babaye ug lalaking naghilawas ibabaw sa nitso sa usa ka wala pa mahibaw-i kun asa nga sam-ang kini nahitabo.

Apan bisan pa niini, pahugtan sa tagdumala sa Calamba Cemetery sa Dakbayan sa Sugbo ang seguridad sa sam-ang ilabi na nga taliabot na ang adlaw sa mga kalag. Makita sa viral video nga adlawan kini nahitabo. Matud pa ni Anthony Baguio, caretaker sa maong sam-ang nga miingon nga sukad sa iyang pangalagad sa maong sam-ang wala pa siya sukad nakadungog og ingon niini nga gihimong motel ang sam-ang.

Sumala pa ni Baguio, kun dili kalag-kalag walay bantay sa sam-ang apan kutob ra sab alas-7 sa gabii ang mga managkot.

Gipahinumdoman ni Baguio ang katawhan nga ang mga sam-ang sagrado ug kinahanglang respetuhon isip pahuwayanan dayon sa mga mitaliwan na sa kalibotan.

Gitug-an usab ni Baguio, preparado na sila nagsingabot nga kalag-kalag. Alang niadtong magpataud og suga, P300  ang bayad ug magsugod sila pagpanaod Oktubre 31 ngadto sa Nobiyembre 2. IBM (BANAT NEWS)