Dul-an sa P700 mil nga drugas nasakmit

CEBU, Philippines — Mokabat ngadto sa P700 mil ang balor sa drugas nga nasakmit gikan sa duha ka suspetsadong pusher atol sa gipahigayon nga buy bust operation sa kapolisan Sawang Calero Police Station diha sa T. Cavan, Barangay Pasil, Dakbayan sa Sugbo niadtong Lunes sa kadlawon.

Ang nasikop mao sila si Reynaldo Daan, alyas “Nicole”, 30-anyos, ulitawo, taga Santo Niño, Barangay Suba, ug giingong high value target sa city level ug Cyril Cartagenas, 19-anyos, taga Barangay Ermita.

Nangulo sa maong operasyon si Police Major Kenneth Paul Albotra ubos sa pakig-alayon sa Philippine Drug Enforcement Agency (PDEA)-7.

Giingong nasakmit gikan sa mga suspetsado ang mga pinutos nga ginadiling drugas nga nitimbang ngadto sa 95 gramos ug nibalor tanan ngadto sa P646 mil ug buy bust money.

Ang mga suspetsado gikatakdang pasakaan og kasong kalapasan sa Section 5 ug 11 sa Akta Republika 9165 kun “Comprehensive Dangerous Drugs Act of 2002”. (BANAT NEWS)