Labella: Isyu sa MCWD board masulbad ra

CEBU, Philippines — Masaligon si Cebu City Mayor Edgardo Labella nga ang isyu kabahin sa pagsupak sa board of directors sa Metropolitan Cebu Water District (MCWD) sa iyang mando nga terminasyon masulbad sa umaabot nga adlaw.

Kabahin sa pangangkon sa MCWD nga wala’y mga local government unit (LGU) nga makahilabot kanila ug sila autonomous, si Labella nagk anayon nga ang siyudad adunay gisunod nga balaod.

Base sa sulat niadtong Oktubre 17, 2019, si MCWD board chairman Jose Mari Yu nipadayag nga dili mosunod sa mando ni Labella kabahin sa pagtaktak sa ubang miyembro sa board.

Matud ni Labella nga nakahibawo na ang MCWD board sa mga legal nga sangputanan kong pabilin sila sa ilang pagsupak.

Si Labella wala pa usab kini motudlo og bag-ong board sa MCWD tungod kay kinahanglan pa niya nga konsultahon  ang ubang opisyal sa siyudad.

Adunay 25 ka ngalan ang girekomendar nga maoy mohulip sa mga nabakanteng  posisyon sa MCWD.

Si Labella nibutyag nga ang basehan sa pagtudlo sa bag-ong MCWD board naglakip sa mga merito ug kwalipikasyon sa kandidato u gang mga mosunod nga miyembro sa board sa MCWD kinahanglan adunay kasinatian sa pagdumala, kahibalo motrabaho kabahin sa teknolohiya sa tubig ug kinahanglan adunay kasingkasing ug integridad. (BANAT NEWS)