Kapin P7 milyon shabu, 19 ka durugista nadakpan
CEBU, Philippines — Usa ka traysikad driver nakuhaan og 1.1 ka kilong gidudahang shabu nga mokabat P7.4 milyones ka pesos sa buybust operation sa kapolisan sa Dakbayan sa Sugbo, samtang babayeng high value target ug 18 ka mga durugista sa Dakbayan sa Talisay ug Mandaue City ang nadakpan sab sa buwag nga mga operasyon.
Sa Cebu City, nadakpan sa grupo ni Police Mayor Henrix Bancoleta ang drayber og traysikad nga si Arnel Salapa Estor, 34, taga Puntod-Alasda sa Barangay Mambaling, sa gilusad nga buybust operation Sabado sa gabii.
Ang suspek diha nadakpan sa Sitio Sto. Niño, Barangay Mambaling human kini kini giingong mibaligya og shabu sa mga operatiba. Nasakmit gikan kaniya ang 1.1 kilong gidudahang shabu nga mokabat og P7,480,000.00 base sa Dangerous Drugs Board value.
Talisay City
Samtang sa operasyon nga gihimo diha sa Sitio Mananga 2, Brgy. Tabunok, Dakbayan sa Talisay niadtong Sabado sa gabii, nadakpan ang high value target nga si Grethel Rabadon Mercado, 29, nagpuyo sa maong dapit.
Giapil pagdakop ang mga tawong gidudahang tiggamitan sab og illegal nga drugas nga naatlan diha sa balay sa suspek nga sila si Joel Gerasmeo Babi, 40; Alexander Navarro Mirasol, 49; Dax Tecson Mosqueda, 36,; Alfre Entrina Macalua, 19; Cleo Aba Selona, 27; Balmer Sanchez Linao, 40; Michael Socobos Alindahao, 31; ug si Victor Nacario Basalo,35.
Si Police Major Gerard Ace Pelare, pangu sa Talisay City Police Station nagkanayon nga makapila na nga milutaw ang pangalan ni Mercado sa pipila ka operasyon hangtud nga nakuha gyud nila ang naulahi.
Nakuha gikan sa mga dinakpan ang 45 ka gagmay nga pakite sa shabu; usa ka medium nga pakite sa shabu nga may gibug-aton tanan nga 26.32 gramos nga adunay bana-banang kantidad nga P178,976.
Mandaue City
Samtang sa Mandaue City, nadakpan sa managlahing buy bust operation ang siyam ka gidudahang pushers diha sa Barangay Cabancalan, Dakbayan sa Mandaue.
Si Police Captain James Conaco sa Basak Police Station sa Mandaue City Police Office (MCPO) miila sa suspek nga si sila si Marilyn Istur, 57, ug Jed Cortes, 35, pulos nagpuyo sa maong dapit.
Matud pa ni Conaco duna silay nadakpan sa nakalabay nga Sabado nga nitumbok sa duha nga maoy gipalitan niini og shabu.
Gipanghimakak sa duha ang pasangil apan si Conaco miingon nga si Cortes ug Istur nalakip nang daan sa ilang drug watchlist.
Ang ubang nangadakpan sa laing operasyon mao ang inahan ug anak nga sila si Rosario Quibo-quibo, 45, ug Zusano Quibo-quibo nga taga Sitio Almers, Barangay Tabok nga nakuhaan og 14 ka paketeng shabu.
Nadakpan sab sila si Enrique Nacua, 40, Allan Lampon, 38, nga nakuhaan og 16 ka paketeng shabu.
Samtang ang Police Station 6 nasikop sab sila si Adrian Colarte; Rolly Ouano ug Aaron Sarabosing tungod gihapon sa illegal nga drugas. (/IBM)(BANATNEWS)
- Latest