Safety measures sa CSCR gihangyo
Butangan og safety measures ang center island diha sa Cebu South Coastal Road sa habig sa Dakbayan sa Talisay nunot sa nahitabong mga aksidente nga nikalas og mga kinabuhi sa maong lugar. Si Jonathan Tumulak, kinsa traffic czar sa siyudad miawhag sa Department of Public Works and Highways (DPWH) 2nd Engineering District nga maoy nag-atiman sa maong karsada paghimo og mga lakang bahin niini.
Apil sa gisugyot nga papintalan ang center island og hayag nga pintal; pagbutang og reflectorized directional signs; pagbutang og guard rails aron kung adunay mawad-an og kontrol sa pagliko sa maong kurbadahong bahin sa CSCR dili na motipas sa pikas nga linya nga makaamong pa og laing motorista.
Ang ikaupat nga sugyot mao ang pagbutang og rumble strips o kanang daghang linya nga bundo nga kun maligsan makapauyog sa sakyanan ug makamatngon ang drayber kun kini nakatagpilaw.
Sa nasayran, pipila na ka disgrasya sa SRP nahitabo kun diin daghan na ang kinabuhi ang nakalas ilabi na sa kurbadahong bahin sa atbang sa Talisay Fish Port. Usa na niini mao ang pagtipas sa mga sakyanan diha sa center island og makaamong pa sa laing motorista nga nagbiyahe.
Gani pinakauwahing panghitabo mao ang pagkapatay sa usa ka lalaking nagmotorsiklo nga naigo sa nilayat nga awto gikan sa pikas nga lane.
- Latest