Taga MCWD nakigkita kang Gullas

CEBU, Philippines — Sa labing unang higayon nibisita ni Talisay City Mayor Gerald Anthony “Samsam” Gullas Jr. ang kadagkuan sa Metropolitan Cebu Water District (MCWD) kagahapon.

Kini isip tubag sa hangyo ni Gullas ug sa konseho nga sila mapasabot sa sitwasyon sa tubig sa dakbayan nga unta naa man kuhaa ang ilang supply.

Nahibaw-an nga 50,000 cubic meters ang gikuha sa MCWD gikan sa siyudad apan 15,000 cubic meters lang ang mahatag ngadto sa mga Talisaynon.  Nahibaw-an nga ang demand sa Talisaynon moabot sa 38,000 cubic meters matag adlaw.

Giawhag sa mayor ang taga MCWD nga makig-alayon sa konseho ingon man sa mga opisyal sa barangay aron mahibaw-an kun unsa nga dapit ang nagkinahanglan og dinaliang aksyon.

Gipasabot sa mayor nga wala gyud siyay laing tuyo sa MCWD gawas nga mahatagan og sulbad ang problema nga giatubang karon. (BANAT NEWS)