Person of interest sa pagpang-gulgol gi-laboratory

CEBU, Philippines – Usa ka person of interest sa kamatayon sa 14-anyos nga dalagita sa Lungsod sa Pinamungahan ang gidala sa Police Regional Crime Laboratory aron kuhaan og DNA samples.

Kagahapon sa buntag gidala sa kapolisan sa Lungsod sa Pinamungahan ang 26-anyos nga lalaki kinsa gitagoan una ang pangalan aron kuhaan og buccal swab sample may labot sa kamatayon ni Justine Andayop.

Matud ni Police Corporal Therese Bellones, ang Women and Children’s Protection Desk investigator sa Pinamungahan Police Station, nga ang maong lalaki gikuha sa panimalay sa inahan niini sa Lahug, Dakbayan sa Sugbo.

Kini human ang igsoon niini ug barangay kapitan ang nihangyo sa maong lalaki sa paglimpyo sa pangalan niini human gitumbok sa pipila ka residente sa lugar diin nahitabo ang krimen.

Dugang pa ni Bellones nga natumbok nga person of interest ang maong lalaki sanglit nibiya kini sa ilang lugar human sa krimen samtang gihisgut-hisgutan ang maong insidente.

Gitug-an ni Bellones nga ang maong person of interest gituohan nga hilomon ug dili kaayo makighalobilo apan adunay nakatumbok nga nakit-an usab kini nga nagkakuyog sa bata nga namatay hinungdan nga ilang gipaubos sa imbestigasyon.

Si Bellones nitug-an nga ang maong lalaki hugot nga nihimakak kanila nga aduna kini kalambigitan sa krimen ug boluntaryo kining nikuyog aron sa paglimpyo sa iyang pangan ug pagkatawo. Ang maong lalaki nga nahinabi sa Banat News hugot nga nihimakak nga siya ang nagpatay sa bata ug nitug-an nga sa nilabay pa nga buwan sila nagkita ug wala usab silay relasyon sa bata.

Gitug-an sa maong lalaki nga nipatim-aw siya sa kapolisan aron sa paglimpyo sa iyang pangan ug pagklaro nga dili siya maoy suspek sa kamatayon sa maong dalagita kinsa ila ra usab nga silingan. Si Dr. Benjamin Lara, chief medico-legal officer sa PNP Crime Laboratory, nitug-an nga ang bata nga si Justine gawas nga giluglog ang liog, aduna pa kini samad dinunggaban sa iyang liog, dughan, bun-og sa ulo, nga posibleng nisukol ang maong batan-on ngadto sa nihimo sa krimen.

Gitug-an ni Lara nga ang person of interest nga gidala sa iyang buhatan gikuhaan kini og buccal swab sample human i-cross match kini sa specimen nga nakuha niya sa biktima aron masayran kung kini ba ang suspek o dili. Dugang pa ni Lara nga madugay-dugayan pa hinoon ang resulta niini kay dalhon pa nila sa kaulohan alang sa DNA Examination sa mga nakuha nila nga specimen.

Sa pagkakaron dili pa sab nila mabutyag kung aduna bay sexual contact nga nahitabo sa maong bata kay ipaubos pa man nila sa examination ang tanan nilang nakuha sa biktima ug sa person of interest. (/GMR)(BANAT NEWS)