Kaandam sa Japan sa kalamidad angayang sundon dinhi sa Sugbo

CEBU, Philippines — Gihangyo ni Konsehal David Tumulak sa Dakbayan sa Sugbo ang nasudnong kagamhanan nga maghimo og laing buhatan alang sa disaster risk reduction management.

Si Tumulak kauban ni City Administrator Floro Casas Jr. ug special assistant sa mayor nga si Jose Daluz III natanggong sa Yokohama, Japan tungod sa kusog nga bagyong Hagibis niadtong Oktubre 11.

Didto nila nasinati ug nasaksihan ang kaandam sa gobiyerno sa Japan ug ang mga sakop niini sa maong katalagman.

“Kinahanglan natong palig-onon ang pagpangandam sa kalamidad sa Siyudad sa Sugbo, busa gidasig namo ang pribado ug publiko nga mga opisina nga maghimo’g mga team bahin sa pagpangandam sa kalamidad aron itudlo ug ipahibalo sa mga tawo,” matud ni Tumulak.

Matud niya nga ang kaluwasan sa katawhan kinahanglan ang labing una nga prayoridad gikan sa mga kalamidad.

Nasaksihan ni Tumulak kung giunsa ang pagdumala sa team sa disaster management sa Japan sa pagdumala sa super typhoon Hagibis.

“Sa Japan, ang mga teknolohiya ug system softwares mao ang ilang ikaduha nga prayoridad. Ang labing una nga prayoridad mao ang human intelligence ug ang pagpangandam,” sumala pa ni Tumulak.

Ang opisina nga gipasabot ni Tumulak maghatag og pagtagad sa pag-andam sa kalamidad, pag-ila sa plano ug pagpatuman sa plano. GMR (BANAT NEWS)