Duha ka lalaki nangatawa sa hubog gidunggab patay

CEBU, Philippines — Duha ang patay sa pagpanunggab diha sa Sitio Danglog, Barangay Cambagti, Lungsod sa Ginatilan niadtong Domingo sa kadlawon.

Ang mga biktima mao sila si Mcrhons Cayacap, 23-anyos, ulitawo, lumad nga taga Surigao del Norte ug temporaryong nagpuyo sa maong lugar ug Michael Ferrer, 18-anyos, taga Sitio Banigon, Barangay Salamangka sa maong lungsod.

Ang suspetsado mao si Orlando Opon, 36-anyos, lumad nga taga Isla sa Camotes ug temporaryong nagpuyo sa Barangay Cagsing sa maong lungsod.

Matud ni Police Corporal Carl Brion Pielago, alert team sa Ginatilan Police Station nga ang ilang hepe nga si Police Captain Ian Paul Arapols ang nagpahibalo kanila sa maong insidente.

Ang kapolisan sa lungsod pinangulohan ni Police Master Sergeant Romeo Casedo ang niresponde sa maong alarma.

Ang Barangay Cambagti usa kini sa bukirang barangay sa Lungsod sa Ginatilan.

Sa imbestigasyon sa kapolisan nga  nagbarug ang maong mga biktima dihang niagi ang pundok sa suspetsado nga nagdala sa ilang higala nga hubog.

Ang maong hubog giingong gikataw-an sa mga biktima hinungdan nga nasuko ang suspetsado ug nibalik kini nga nagdala na og kutsilyo dayon dunggab ngadto sa mga biktima.

Human sa pagpanunggab dihang nangahagba na ang mga biktima nilakaw biya sa lugar ang suspetsado padulong pauli sa ilang balay.

Si Cayacap dali nga gidala sa mga tanod ug paryente niini diha sa Malabuyoc District Hospital apan gideklarar kining patay na nga naabot sa maong tambalanan. Samtang si Ferrer gibalhin kini sa tambalanan sa Dakbayan sa Sugbo apan nakabsan usab kini sa kinabuhi.

Ang suspetsado nasikop kini diha sa balay sa iyang inahan human sa gipahigayon nga hot pursuit operation. Ang kutsilyo nga gigamit sa pagdunggab wala ma-recover sa mga polis ug gituohang gilabay kini sa suspetsado. (/BDB)(BANATNEWS)