Mga kaso sa inmates sa BJMP-7 monitoron

CEBU, Philippines — Nipirma og kasabotan ang Bureau of Jail Management and Penology (BJMP)-7 ug ang University of San Carlos nga magtinabangay aron maluag ang naghuot na karong Cebu City Jail pinaagi sa volunteer law students nga mag- monitor sa mga kaso sa mga priso.

Si BJMP-7 Director Jail Chief Superintendent Paulino Halamani Moreno Jr. ug USC President Fr. Dionisio Miranda nipirma og memorandum of agreement atol sa anibersaryo sa Cebu City Justice Zone niadtong adlaw nga Biyernes.

Base sa talaan niadtong bulan sa Agusto ning tuiga, ang CCJ duna na karoy 5,800 ka priso, ang 4,439 niini mga lalaki  ug 898 mga babaye. Samtang 63 sab ang anaa sa Operation Second Chance, ug 400 sab ang gikan sa City of Naga jail.

Diha sa Operation Second Chance gibutang ang mga menor de edad nga nakalapas sa balaod samtang ang gibutang nga mga inmates gikan sa Naga gibalhin lang diha sa CCJ tungod kay landslide prone area ang prisohan sa maong siyudad.

Ubos sa MOA, ang BJMP sa siyudad u gang USC magkooperar sa usa’g-usa aron tabangan ang mga priso nga mahikutar o malihok ang ilang mga kaso. Pinaagi sa paspas nga paghusay ug madesisyonan dayon sa korte, gipanglantawan nga maluag-luag sab ang maong prisohan ilabi na kun maabswelto sa kaso o ibalhin sa laing pasilidad ang mga akusado human sa paghusay.

Ang USC Community Extension Services, pinaagi sa USC-Center for Legal Aid Work maoy mangulo sa maong programa samtang ang BJMP motabang sab ug mokooperar sa USC sa implimentasyon sa monitoring ug koordinasyon.

Ang MOA mapaso human sa tulo ka tuig ug mahimong i-renew sa duha ka habig. (Gikan sa The Freeman/IBM)