Cebu City medium-compliant ra sa clearing operation-DILG

CEBU, Philippines — Giila sa Department of Interior and Local Government (DILG) ang Dakbayan sa Sugbo nga usa ka medium-compliant local government unit sa mando ni Presidente Rodrigo Duterte sa pagpalimpyo sa kadalanan gikan sa mga babag sama sa mga illegal nga mga estraktura ug street vendors.

Hinuon misaad si Mayor Edgardo Labella nga magpadayon ang clearing operations sa syudad aron pagtuman sa mando ni Duterte sa tuyo nga mas mosaka pa ang compliance level sa dakbayan isip primerong siyudad dinhi sa Central Visayas.

Giangkon ni Labella nga nasuya siya sa nganong ang mga lungsod nakaangkon og taas nga marka.  Kini human nga na-downgrade ang unang marka nga gihatag sa DILG nga mas taas itandi sa bag-ohay lang gipagawas nga resulta.

Apan matud ni Labella, bisan pa og nausab ang resulta molihok gihapon ang siyudad alang sa kalamposan sa paglimpyo sa kadalanan sa dakbayan.

Ang siyudad magpadayon sa anam-anam nga pagpanglimpyo. Sa iyang unang pahayag, gipahibalo ni DILG Undersecretary Martin Diño nga ang lungsod nakakuha og taas nga grado inspeksyon.

Sa uban pang mga dagkong lungsod sa Metro Cebu, ang Dakbayan sa Lapu-Lapu giila nga low-compliant, samtang ang Mandaue City, sama sa Cebu City, giila nga medium-compliant.

Kini tungod kay daghan pa gihapon og mga nakaali sa mga aseras sa mga kadalanan sa Lapu-Lapu City nga wala gihapon hiposa.

Samtang, ang mga lungsod sa Bogo ug Naga, ug mga lungsod sa Barili ug Samboan sa Sugbo giila nga nakasunod gyud sa mandato ni Duterte.

Base sa listahan nga gipagawas sa DILG, 97 ka LGUs ang napakyas sa pagtuman nga naglakip sa 12 ka lungsod sa Central Visayas.

Ang mga mayor gimandoan pag-esplikar ug kadtong dili makatubag isumbong kang Duterte aron pasakaan og kaso diha sa Ombudsman.

Pito ka LGU sa lalawigan sa Sugbo ang wala makapasar. Naglangkob kini sa Carcar City ug mga lungsod sa Badian, Carmen, Compostela, Ginatilan, Moalboal, ug Pinamungajan.

Samtang, upat ka LGU sa lalawigan sa Bohol ang napakyas sa pagsusi. Kauban niini ang Antequera, Garcia Hernandez, Talibon, ug Valencia. Ang lungsod sa Larena sa Siquijor nakakuha usab og mubo nga marka.

Makadawat og show cause order ang mga LGU nga wala mipasar. Ang DILG nagpahayag nga ang mga paningkamot sa paglimpyo sa kadalanan sa mga LGUs kinatibuk-ang nagmalampuson tungod kay 1,148 ka LGUs sa tibuok nasud ang nakituman niini.

Si DILG-7 Regional Director Leocadio Trovela, mapasalamaton sa tanang LGUs ug partner agencies nga nituman sa maong DILG-Memorandum 2019-121.

Dugang pa ni Trovela, ang pagtuman sa mga LGUs nakatabang sa kagamhanan sa pagsulbad sa problema sa trapiko sa Central Visayas, diin ang mga highly urbanized cities sa Cebu.

Ang publiko giawhag nga motabang pagsumbong sa mga malapason sa maong proyekto ilabi na kun nakaali na sila sa mga dalan. (/IBM)(BANATNEWS)