80-anyos napaig sud sa nasunog nga balay

CEBU, Philippines —  Usa patay ug usa ang angol sa sunog nga niulbo sa may Sitio Banics, Talamban Cebu ning Dakbayan sa Sugbo, Biernes sa buntag, firetruck sa kabomberohan sa Talamban diriyot pa gyud matagak sa bung-aw atol sa pagresponde.

Ang nakalas naila nga si Talino Biyong Litoy, 80, usa ka disabled ug naginusara lang sa balay atol sa pagkahitabo sanglit nagpuyo kini sa pikas nga balay.

Samtang ang naangol mao si Doris Saberon, 46, nga nakaangkon og 1st degree burn ang naangkon sa iyang luyo nga bahin sa lawas.

Ang nasunog nga panimalay iya sa anak nga si Cherry Litoy Matod, ug ipaubos pa sa imbestigasyon ang hinungdan sa maong sunog.

Matud pa ni Senior Fire Officer 3 Lorenzo Cabigas sa Cebu City Fire Station, nadawat nila ang alarma alas 9:22 sa buntag apan paglabay sa 13 minutos nakontrolar kini apan naugdaw gyud ang panimalay ug nakan-an sab sa kalayo sa katupad niining balay nga iya ni Saberon.

Gibanabanang mokabat P50 mil ang danyos sa maong sunog. Sumala pa nga dili na makabarog ang nakalas ug maoy gituohang hinungdan nga wala na kin makagawas pa sa balay.

Ang kabombero nitan-aw pa karon sa hinungdan sa pag-ulbo sa maong sunog.

Base sa imbestigasyon, si Fire Officer 2 Emerson Arceo miingon nga ang anak sa namatay nagpuyo sa laing balay.

Tungod kay ginama sa gaay ang balay paspas kaayo ang pagkasunog niini ug napagan sab ang katupad nga balay.

Ang University of San Carlos Fire Brigade mitabang sab sa kabomberohan sa siyudad pagresponde.

Apan usa sa mga firetrucks nga nirespondeng iya sa Talamban BFP ang diriyot matagak sa bung-aw. Ang agianan sa lugar yuta ug pwerteng gamaya. IB (BANATNEWS)