Tigpautang nga Indian gipatay
CEBU, Philippines — Tigpatanto nga Indian national gipusil patay sa wala mailhing mamumuno diha sa Sitio Iba, Barangay Basak, Dakbayan sa Lapu-Lapu alas 11 pasado ang takna sa Biyernes sa buntag.
Si Police Major Juan Capacio, hepe sa Presinto 4 sa Lapu-Lapu City Police Office (LLCPO) miila sa biktima base sa iyang driver’s license nga kini mao si Gagandeep Singh, 27, nag-abang og apartment sa Barangay Bankal sa maong dakbayan.
Sa pasiunang pakisusi sa kapolisan, giingong niabot ang biktima sa lugar alang sa iyang naandang pagpangolekta sa bayad sa mga gipautang niining mga residente sa lugar.
Apan samtang naningil kini giingong may miduol nga wala mailhing tawo nga diretsong nipusil sa biktima. Ang biktima nalukapa samtang nagkabayo pa sa iyang motorsiklo.
Human sa maong pagpamusil daling misibat ang mamumuno palayo sa dapit.
Si Capacio miingon nga mohimo pa sila og dugang imbestigasyon alang sa pagsuta sa hinungdan sa maong pagpamusil ug ingon ang pag-ila sa mamumuno.
Apan usa sa gitan-aw nga motibo sa kapolisan kabahin sa kamatayon sa biktima mao ang negosyo niining pagpautang ug gituohang dunay nasilo sa mga gipaninglan niini. IBM (BANATNEWS)
- Latest