Pagpanagmal sud sa OSC imbestigahon

CEBU, Philippines – Gimandoan ni Cebu City Police Office City Director Police Col. Gemma Cruz-Vinluan ang hepe sa Abellana Police Station nga si Police Major Edward Sanchez sa paghimo og imbestigasyon kung aduna bay nahitabong pagmaltrato sa mga residente sa Operation Second Chance sa Barangay Kalunasan ning Dakbayan sa Sugbo.

Gusto ni Vinluan makuhaan og pamahayag ang duha ka mga minor de edad nga nitahan pagbalik sa ilang kaugalingon ug nitug-an nga sobra kaestrikto ug dagmalan sila sulod sa maong pasilidad.

Sumala pa ni Vinluan, magpaabot siya sa resulta sa imbestigasyon nga gihimo ni Sanchez ug kung adunay moreklamo ug kun tinuod kini dili sila magpanuko sa pagpasaka og kaso.

Sa pagkakaron padayon silang nanawagan sa mga ginikanan sa lima pagpatahan kanila aron dili sila malakip nga mapasakaan og kaso kung masayran sa kapulisan nga gitagoan sila sa ilang mga pamilya.

Si Vinluan, nimando na usab sa tanang station commanders diin adunay record kining maong mga batan-on sa paninguhaong masikop sila pagbalik. (/IBM) (BANAT NEWS)