Way sakay sa luyo sa truck ipatuman sa LTO-7

CEBU, Philippines – Ipatuman sa Land Transportation Office 7 ang pagdili sa mga pick-up trucks ug dump trucks nga mopasakay og pasahero sa luyo nga bahin sa sakyanan.

Kini ang baruganan ni LTO-7 Director Victor Emmanuel Caindec subay sa memorandum nga gipagawas sa ilang ulohang buhatan aron ipatuman ang Section 51 sa Republic Act 4136 o ang Land Transportation and Traffic Code.

Matud ni Caindec nga dili sila gusto nga subling mahitabo ang disgrasya sa Lungsod sa Boljoon diin dunay mga estudyante nga namatay human nalimbuwad ang dump truck nga gisakyan sa pagtambong sa kalihukan sa tunghaan.

Ang LTO-7 mopadala og suwat sa mga Local Government Units aron masayud sa maong palisiya.

Matud ni Caindec nga naandan na sab sa ubang LGUs ilabi na sa kabarangayan ang pagpalit og mga truck aron kargahan og mga tawo panahon nga dunay kalihukan sama sa fiesta, birthday ug lubong.

Giawhag ni Caindec ang mga construction companies ug ang mga magtumod og utanon nga hunungon ang pagpasakay og mga tawo sa luyo nga bahin sa sakyanan.

Ang masakpan pahamtangang og multa sa kalapasan sa overloading ug reckless driving.

Hinoon, si LTO Executive Director, Atty. Romeo Vera Cruz, niingon nga mahimong sakyan og usa ka tawo ang luyo nga bahin sa truck kun dunay karga aron mabantayan ug dili kawaton apan giklaro niini nga dili pasobrahan ang tawo nga sakay.

“Pwede ra magbutang og bantay, basta lang dunay magunitan ug maghinay-hinay lang pud ang driver,” sigun ni Cruz. (/GMR)(BANAT NEWS)