Dakbayan sa Talisay magtukod og mga library
CEBU, Philippines – Ang kagamhanan sa Dakbayan sa Talisay mopatukod kini og public library diha sa tulo ka barangay sa Lagtang, Tabunok ug Bulacao.
Ang maong public library tawgon kini og “Aksyon Agad Learning Center” diin kagahapon gipahigayon ang groundbreaking sa maong mga library.
Si Mayor Gerald Anthony “Samsam” Gullas, Jr. ang nangulo sa nahisgutang groundbreaking.
Ang kagamhanan sa siyudad nigahin og pundo alang sa pagpatukod og mga library diin ang barangay na ang mangita og luna nga katukoran niini. Matud ni Gullas nga imbes dakong public library ang tukoron mas ganahan siya nga anha sa matag barangay kini itukod aron ang mga residente sa barangay nga buot magtuon o mag-research dili na moadto pa sa layo.
Gihangyo ni Mayor Gullas ang matag kompaniya nga modonar og mga libro o computer set aron magamit diha sa mga library kini isip pagpakita sa kompaniya sa ilang corporate social responsibility.
Si Gullas naglaom usab sa mga pribadong indibidwal nga makahatag og tabang alang sa mga kagamitan sa learning center aron kapahimuslan sa tanan. (/BDB)(BANAT NEWS)
- Latest