Paggamit og plastic bag gidili sa Lapu-Lapu
CEBU, Philippines — Higpit na nga gidili sa kagamhanan sa Dakbayan sa Lapu-Lapu ang paggamit sa mga plastic bag.
Ang kagamhanan sa siyudad niawhag sa mga molupyo sa lugar sa pagdala og ilang kaugalingong sudlanan panahon sa ilang pagpangompra diha sa merkado publiko aron sayon ang ilang pagbitbit sa ilang mga pinalit. Ang konseho sa siyudad nipalabang sa City Ordinance No.15-003-2019 nga mao ang pagdili sa paggmit og plastic bag. Ang maong ordinansa gitawag kini og environmental friendly ordinance kinsa si Mayor Junard Ahong Chan ug Bise Mayor Celedonio Sitoy nagtinabangay aron maaprobahan kini.
Ang maong ordinansa higpit usab nga nag-regulate sa paggamit sa “single use plastic” ug ingon man nagdili usab sa paggamit sa mga plastic drinking straw.
Gipasabot sa ilang gipatuman nga ordinansa sa kagamhanan sa maong dakbayan nga 80 porsyento sa mga plastic bag nga gigamit sa mga kamerkadohan og kabalayan ang mopadulong kini ngadto sa kadagatan ug makadaot sa marine life ug mobara usab sa drainage system. Ang gagmay ug dagko nga mga establisamento sa siyudad giawhag nga dili na mogamit og mga plastic bag nga maoy sudlan sa mga pinalit sa ilang mga kustomer. Ang mga establisamento giawhag sa pagpagamit sa ilang mga kustomero og eco bag, paper bag, net bag o ang mamalitay magdala na lang og ilang kaugalingong sudlanan sa ilang pagpangompra. BDB (BANAT NEWS)
- Latest