Nagpatay sa bata ug call center agent padayong gipangita

CEBU, Philippines — Gihatod sa iyang kapahulayang dayon ang bata nga nakit-ang wala nay kinabuhi sulod sa auto sa usa ka bombero niadtong Sabado sa hapon.

Kini ang gitug-an ni Police Major Christian Torres, hepe sa Balamban Police Station nga nahinabi sa Banat News.

Matud pa ni Torres nga walay foul play nga nakita ang Scene of the Crime Operation (SOCO) ug niadtong adlaw’ng Domingo dili usab motugot ang inahan nga ipa-autopsy ang patay’ng lawas sa iyang anak.

Matud usab ni Torres nga padayon ang ilang imbestigasyon batok kang Fire Officer 1 Orland Paul Romero, sa Balamban Fire Station apan base sa ilang pasiunang imbestigasyon wala sila’y nakita nga lapso sa maong fireman.

Samtang ang direktor sa Police Regional Office 7 Police Brigadier General Debold Sinas nibutyag nga iyahang gitahas sa hepe sa kapolisan sa lungsod nga palawoman pa sa imbestigasyon.

Sa laing bahin, wala gisalikway sa kapolisan sa Talamban Police Station ang posibilidad nga may kalabutan sa tulis ang usa sa mga motibo nga ilang nakita sa kamatayon sa usa ka call center agent nga si Jouie Lee Villagonzalo, 25, taga Barangay Sambag 2, Dakbayan sa Sugbo kinsa ang patay’ng lawas niini napalgan diha sa Barangay Tagbao bukiran nga bahin sa Dakbayan sa Sugbo niadtong adlaw nga Biyernes.

Kini ang gitug-an ni Police Captain Jonathan Taneo, hepe sa Talamban Police Station.

Gisusi usab sa kapolisan ang kuyog sa bikitma dihang wala pa kining gipatay.

Ang kapolisan nagtuo nga ang patay’ng lawas sa biktima gilabay lang kini diha sa Barangay Tagbao. BDB (BANAT NEWS)