Bata gikan nisimba gipatay sa laing bata
CEBU, Philippines — Patay ang usa ka 16-anyos nga lalaki human kini gipusil samtang nagkuyog sa iyang manghud gikan nanimba samtang ang duha naglakaw diha sa may F. Rallota Street, Barangay Poblacion Danao City, Domingo sa gabii.
Ang Biktima mao si Arriz Banson, taga Sitio Kamalig Bato, Barangay Tabok sa maong siyudad, samtang ang suspetsado usa usab ka minor de edad.
Matud pa ni Police Senior Master Sergeant Rene Camarco, Desk Officer sa Danao City Police Station, base sa initial investigation sa ilang imbestigador gikan nanimba ang biktima kuyog sa iyang manghud nga naglakaw pauli sa dihang pag-abot sa maong lugar kalit niabot ang suspek uban sa mga higala niini ug nanghagit ug sinukmagay.
Sumala pa ni Camarco, nikaratil og dagan ang managsuon apan gigukod kini sa grupo sa suspek hangtud nga naapsan. Ang suspek walay pagduhaduhang niibot og armas dayon gipusil si Banzon diha sa walang dughan. Dali nga nanagan ang mga suspek palayo samtang ang biktima gitabang sa mga tawo ug gidala sa tambalanan apan nakutloan kini sa iyang kinabuhi human sa pipila ka gutlo.
Ang suspetsado nga minor de edad nasikop sa follow-up operation ug kasamtangan kini karon nga gikustodiya sa kapulisan samtang nagpadayon pa ang gihimo nga imbestigasyon kung unsay motibo sa pagpusil niini kang Banzon. IBM (BANAT NEWS)
- Latest
