Duha gipatay sa Talisay City

CEBU, Philippines — Duha ka mga lalaki ang patay sa managlahing hitabo sa Dakbayan sa Talisay niadtong Sabado samtang ang siyudad nagsugod na sa ilang mga kalingawan alang sa umaabot nga pangilin sa ilang Patrona nga si Santa Teresa Avila.

Niadtong Sabado sa gabii, patayng usa ka lalaking sakop sa Akrho Fraternity human gipusil og wala mailhing lalaki diha sa gawas nga bahin sa peryahan atubangan sa Talisay City Hall sa Barangay Lawaan 2.

Ang biktima mao si Michael Responso, 25, taga Sitio Rainbow Ville, Brgy. Biasong sa maong siyudad.  Usa ka alyas Lloyd nga taga Mananga 2, Barangay Tabunok ang gitumbok nga nagpatay sa biktima.

Base sa inisyal nga imbestigasyon sa kapulisan nasuta nga kuyog sa iyang igsuon ug uyab ang biktima nga nagkalingaw sulod sa peryahan. Apan sa pagbiya na nila sa dapit kalit gisikitan sa suspek ang biktima ug gipusil sa ilokan dayon dagan ug nisakay og motorsiklo.

Gitabang ang biktima apan nakabsan gyud kini sa iyang kinabuhi. Sa pagabot sa mga polis sa crime scene, usa ka Marck Darril Canales, 22, taga Sitio Tambis, Brgy. Pooc, sa mao gihapong siyudad nga apil sa nanguryoso sa lugar ang ilang gisikop human nasakpang nagluklok og icepick.

Si Police Captain Nazarino Emia, deputy chief sa Talisay City Police Station miingon nga nibuwag na sa iyang grupo ang nakalas base sa nakuha nilang inisyal nga impormasyon. Gisusi pa nila kun unsay motibo sa maong pagpatay.

Samtang patay sab ang usa ka 22-anyos nga lalaki human kini gipusil tumong sa mata sa usa ka wa mailhing mamumuno diha sa Barangay Jaclupan, Dakbayan sa Talisay niadtong Sabado sa hapon.

Ang biktima mao si Juneric Elladora, 22, nagpuyo sa maong dapit. Sa imbestigasyon sa kapulisan nasuta nga bag-o lang nakabalik sa ilang lugar ang biktima sukad nga nibiya kini tulo ka buwan na ang nilabay.

Kuyog sa biktima sa iyang kapuyo didto sa Syudad sa Toledo samtang sila nanarbaho sa usa ka peryahan. Niadtong Oktubre 1 ning tuiga nabalik sila og diha mipundo sa payag nga maoy estambayan sa iyang mga barkada.

Apan natingala nalang ang mga silingan nga nakadungog og usa ka masipang buto. Nakit-an ang biktima nga nagbuy-od na ug wa nay kinabuhi ug duna kini samad sa mata.

Padayon pa nga gisuta kun kinsa ang nagpusil patay sa biktima ug ang motibo niini. (/IBM)(BANATNEWS)