Pagkuha ug pag-renew og driver’s license pahugtan

CEBU, Philippines — Aron mahinayon na ang mga planong kausaban aron mapalambo ang kahimtang sa trapiko sa kadalanan sa nasud, ang Land Transportation Office nagplanong pahugtan na ang pag-isyu og lisensya sa mga drayber.

Sa gisugyot nga programa sa LTO, kinahanglang ang tanang molukat og lisensya mopaubos gyud una og driving lessons gikan sa mga accredited nga dring schools ug accredited driving instructors.

Sa samang higayon, pahugtan na sab ang mga driving schools ug driving instructors pinaagi sa pagparehistro kanila diha sa ilang buhatan ug ang LTO na maoy mohatag kanila og traning manuals ug curriculum para maoy ilang itudlo sa mga drayber nga mao usab ang gikinahanglang makat-onan sa mga drayber.

Ang maong sugyot gititulohan og "Enhance Driving School Accreditation and Standardize Driver Training and Educations.”

Apil sa kinahanglang magagi niini ang mga magkuha palang og student-driver's permit ug kadtong magkuha na og driver's license ingon man mag-renew niini.

Si LTO-7 Regional Director Victor Emmanuel Caindec sa Kapihan sa LTO-7 nga nagsilbi sab nga public consultation niadtong adlaw nga Biyernes miingon nga pinaagi niini mas epektibo na nilang mapatuman ang mga programa alang sa luwas nga pagmaneho sa kadalanan dili lamang ang paghapsay sa dagan sa trapiko.

Kini subay sa kamandoan ni Pres. Rodrigo Duterte nga ipatarong ang kasamtangang sitwasyon sa trapiko sa nasud. Matud ni Caindec kun dili usbon ang naandang sistema malisud para kanila ang pagkab-ot niini.

Kini tungod kay mamenus-menusan na gyud ang mga badlungon gumikan kay apil sa mga modules nga ilang makat-onan mao ang road courtesy ug madugangan pa sama sa basic mechanics ug trouble shooting. Aron pagsigurong tarong ug makamao gyud magmaneho og sakyanan ang mokuha og lisensya, hasta ang mga driving schools higpitan sab sa LTO; ang maong mga driving schools ug driving instructors mao usab ang inisyal nga motabang pagproseso sa mga aplikante pagkuha og lisensya tungod kay ang ilang biometrics mao lamang unya ang basehan sa LTO nga kining nag-apply nakaagi gyud og training.

Gawas pa niana, ang mga driving schools kinahanglang kompleto sab sa mga pasilidad sama sa classrooms, audio-visual aid, ug uban pa.

Apil sab ang klase sa mga sakyanan depende sa driving skills nga ilang itudlo sama sa light vehicles, heavy equipment, o motorsiklo.

Kinahanglan sab silang adunay kaugalingong maneuvering range diin didto magpraktis og drive; samtang kung sa karsada sila mag-praktis kinahanglang magkuha sila og permit sa LGUs diin sila magmaneho.

Kinahanglang makapasar ang estudyante sa classroom ug actual driving skills ayha pa kini tugotang makakuha og lisensya.

Apan kinahanglan sab una silang makapasar sa eksaminasyon nga ihatag sa LTO ug aktwal sab nga pagmaneho og sakyanan o motor.

Samtang gihangop sa pipila ka mga representante sa mga driving schools dinhi sa Sugbo ang maong sugyot. Adunay pipila kanila ang may pagduhaduha tungod sa kadako unya sa ilang kinahanglang gastuhon aron makakuha og accreditation.

Gawas pa niana, may mga nitumaw nga pagdudang kayahon ba kini sa mga driving schools ang pagdawat og gatosan ka mga mag-refresher driving course nga mag-renew sa ilang lisensya karon nga pipila pa lamang ang mga driving schools.

Dili pa hinuon kini ipatuman sa pagkakaron sanglit padayon pa ang public consultation bahin niini. Apan gipanglantawan nga pinaagi niini, daghang mga drayber nga nakalusot pagkuha og lisensya bisan dili angayan ang dili na unya maka renew sa ilang lisensya kun di sila mag-agi og driving school. (BANATNEWS)