Patay nga bata sud sa awto

CEBU, Philippines — Usa ka patay nga lawas sa bata ang nakit-an sa sulod sa usa ka awto nga naka-parking atubangan sa Balamban Fire Station, Barangay Santa Cruz, Lungsod sa Balamban kagahapon sa hapon adlaw nga Sabado.

Ang patay nga lawas sa bata wala pa mailhi hangtod ning pagsulat ug wala pa sab matino ang pangidaron.

Base sa inisyal nga imbestigasyon sa Balamban Police Station mokuha unta sa iyang jacket si Fire Officer 1 Orland Paul Romero sa sud sa iyang sakyanan nga Hyundai Accent nga may plakang GAR 7432.

Gi-park niya kini sa atubangan sa ilang buhatan. Apan sa pag-abli niya sa sakyanan nakurat siya nga dunay bata nga wala nay kinabuhi nga naghapa sa salog sa luyong bahin sa awto.

Sa dihang nakita ni Romero ang maong lawas sa bata  dali siyang nipahibalo sa ilang labaw.

Padayon pa ang kapulisan sa ilang imbestigasyon pag-ila sa bata ug pagtino kun unsay nahitabo kaniya ug kun nganong naabot kini sa sud sa maong sakyanan.

Ang bomberong si Romero wala makaila sa maong bata.

Ang kapolisan sa Balamban nagpaabot pa sa resulta sa imbestigasyon sa Scene of the Crime Operations. (/IBM)(BANATNEWS)