MOA tali sa liloan ug MCWD putlon

CEBU, Philippines — Gikatakda nga putlon sa kagamhanan sa Lungsod sa Liloan ang Memorandum of Agreement niini tali sa Metropolitan Cebu Water District.

Sa pagpadayag sa ilang kadismaya sa serbisyo sa MCWD, ang konseho sa lungsod nipasar og resolusyon nga nagtugot kang Mayor Christina Frasco sa pagputol sa MOA.

Niadtong 1992, ang MCWD nipirma og MOA tali sa kagamhanan sa lungsod aron pagkuha og tubig gikan sa 17 ka atabay sa lungsod.

Matud sa konseho nga dili makiangayon sa katawhan sa lungsod sa Liloan nga gipahimuslan sa MCWD ang tubig gikan sa lungsod apan ang katawhan nag-antus sa dili maayong serbisyo ug gani wala nakabahin sa sakto sulod sa dul-an na sa 30 ka tuig.

Ang resolusyon gipangamhanan ni Konsehal Aljew Frasco, ang bayaw sa mayor.

Sumala sa kasabutan nga ang MCWD nisaan nga mohatag sa walay hunong nga suplay sa tubig adlaw ug gabii sa taga Liloan lakip na sa bukirang mga barangay.

Apan matud ni Mayor Frasco nga dul-an na sa 30 ka tuig sukad sa pagpirma sa MOA, duha sa atabay sa MCWD ang dili na magamit samtang walay nahatag ngadto sa lungsod.

Wala sab nakaabot ang tubig sa MCWD ngadto sa bukirang mga barangay ug ang lokal nga kagamhanan na ang nagpaugmad niini.

“Our people literally thirst for the water MCWD takes from them, giving little or nothing back in return,” matud ni Mayor Frasco.

Ang tigpamaba sa MCWD nga si Charmaine Rodriguez-Kara niingon nga nagkatagbo na sila sa mayor niadtong Huwebes.

“Nag-meeting nami with her gahapon together with technical teams. I think nakasabot nato siya,” matud ni Rodriguez-Kara.

Niadtong Miyerkules si Mayor Frasco nihimo og kinalit nga inspeksyon sa mga atabay sa ug tangke sa MCWD sa Liloan diin gikuha ang 15 million liters per day nga suplay sa Metro Cebu.

Iyang nasuta nga sa 17 ka atabay sa MCWD sa upat ka barangay, guba na ang uban niini ug dunay duha nga dili na gyud magamit ug gibiyaan na. (BANATNEWS)