P10 milyon nahatag sa Kapitolyo sa Bantayan

CEBU, Philippines – Moabot sa P10.24 milyones ang kantidad sa nahatag nga financial assistance sa Kapitolyo sa Isla sa Bantayan atol sa pagbisita ni Gob. Gwendolyn Garcia.

Sa report sa Provincial Information Office pinaagi sa official Facebook page sa Kapitolyo nga moabot sa P392,200 ang indemnity assistance sa mga mag-uuma nga apektado sa huwaw.

Ang Lungsod sa Bantayan nakadawat og P2.9 milyones; P1.3 sa Sta. Fe ug P2.2 milyones sa Madridejos alang sa development projects ug socio-cultural nga kalihukan sa maong mga lungsod.

Atol sa pagbisita sa gobernador sa mga isla nasinati niini ang kainit sa mga gym Sta. Fe ug Madridejos hinungdan nga nisaad kini nga mohatag og dagkung electric fan alang sa mga lungsod.

Ubang kalihukan nga gitambungan ni Garcia sa isla mao ang dental ug medical mission, ribbon cutting sa bag-ong Ticad Bridge sa Bantayan, pagbisita sa pasilidad Bantayan District Hospital ug pagprima sa kasabutan tali sa Mactan-Cebu International Airport Authority alang sa pagpalambo sa Bantayan Airport. (/GMR)(BANAT NEWS)