Library sa eskwelahan nasunog

CEBU, Philippines – Mokabat sa P550,000 ang gibilin nga danyos sa nahitabong sunog sa Sitio Matumbo, Barangay Pusok, Dakbayan sa Lapu-Lapu alas 3:15 kagahapon sa kaadlawon.

Si Lapu-Lapu City Fire Central District chief investigator Feleciano Miral niingon nga nagsugod ang kayo sa library sa Pusok National High School ug nitapon ngadto sa sikbit nga kabalayan sa luyong bahin sa tunghaan.

Dili mominus 15 ka balay ug mga boarding houses ang nalakip sa pagkasunog.

Ang principal’s office ug library sa maong tunghaan ang nakaangkon og kadaut ug wala hinoon nakatapon ngadto sa mga lawak saringan tungod kay napugngan man kini sa nitubag nga kabomberohan.

Dali nilang gipaubos sa Task Force Alpha sa pagseguro nga kapugngan ang pagkaylap sa kayo sa daghang kabalayan sa maong lugar nga pulos ginama sa kahoy.

Nitubag sa pagpawong sa kayo ang kabomberohan sa sikbit nga mga lugar nga naglakip sa Consolacion Fire Station, Cordova Fire Station, Mandaue City ug uban pa.

Si Miral niingon nga alas 4:14 sa buntag ilang nakontrolar ang kayo ug hingpit nilang napawong alas 7 na sa buntag.

Si Miral niingon nga mohimo pa sila og dugang imbestigasyon sa pagsuta sa hinungdan sa kalit nga pagsilaob sa kayo.

Apan matud ni Senior Fire Officer 1 Hadjiloden Samonte nga ilang gitutukan ang electrical ignition tungod sa lost connection nga maoy hinungdan apan ila pa kining paladman.

Walay gikataho nga naangol o nakalas sa maong sunog. (Rowena D. Capistrano/GMR)(BANAT NEWS)