Level 2 gitinguha sa Lapu-Lapu hospital
CEBU, Philippines – Nagtinguha si Lapu-lapu City Mayor Junard “Ahong” Chan nga mahimong level 2 ang Lapu-Lapu City Hospital.
Matud sa mayor nga sa iyang paglingkod maoy iyang unang gitutukan ang Lapu-Lapu City Hospital aron maatiman ang katawhan.
Kini human aduna siyay daghang reklamo nga nadawat nga ang maong tambalalan nahimo ra kining transfer station padulong sa Dakbayan sa Sugbo.
Sumala pa ni Chan nga sa iyang pagsusi, iyang nasuta nga ang construction sa phase 1 niadto pang 2015 unta mahuman apan niabot nalang ang 2019 wala pa mahuman hinungdan nga iyang gipatawag ang contractor.
Iyang gihatagan og ultimatum ang contractor nga humanon sa Septiyembre 30 ug mapasalamaton siya nga kini nahimo ug hingpit nang napahigayon ang blessing sa phase 1.
Dugang ni Chan nga iyaha na usab karon gipatawag ang laing kontraktor sa phase 2 kinsa gipaabot nga mahuman unta sa 2017 o 2018 apan hangtud karon wala gihapon.
Iya nasab gihatagan kutob sa buwan sa Nobiyembre ang kontraktor sa paghuman niini.
Gitug-an ni Chan nga nagpadayon usab karon ang phase 3 ug sila sa kagamhanan ang mangita og pamaagi alang sa phase 4 lakip ang mga ekipo tungod kay anaa sila karon sa level 1 ug ni-apply sila pagka-level 2 hospital hinungdan nga nagbutang sila karon og medical staff ug medical equipment. (/GMR)(BANAT NEWS)
- Latest
