Mga nasakmit nga ilegal nga drugas giimbentaryo
CEBU, Philippines — Nipahigayon og imbentaryo sa ilang mga nasakmit nga ilegal nga drugas ug pinaugang dahon sa marijuana ang Philippine National Police (PNP) Crime Laboratory-7.
Ang maong mga ilegal nga drugas mga ebidensiyia kini ug si Police Regional Office (PRO)-7 direktor Police Brigadier General Debo Sinas ang nisaksi sa pagpahigayon sa imbentaryo.
Si Police Colonel Roderick Pausal, hepe sa PNP Crime Lab-7 nangulo sa maong imbentaryo.
Matud ni Pausal nga tumong sa maong inventory aron sa pagpakita sa katawhan nga hugot nga seguridad ang ilang gihimo sa ebidensya nga ilang gihuptan ug dili kini basta-basta ma-recycle, ma-tampered ug mabinuangan tungod kay tulo ka tawo ang naghupot sa mga yawi ug dili maabli sa usa ka tawo lang.
Gibutyag ni Pausal nga sukad niadtong tuig 1970 aduna silay 578 ka kilo nga shabu ug 470 ka kilos nga marijuana apan human nila na turnover sa korte ang mga ebidensiya karon aduna nalang silay 116 ka kilo nga shabu ug 370 ka kilo nga marijuana nga anaa sa ilang custodial facility.
Matud ni Pausal nga ilang sigurohon nga matag request nga moabot sa ilang buhatan adunay tukmang mga dokumento.
Sa iyang bahin, si Sinas nagkanayon nga sa buwan sa Septiyembre aduna na silay nakonpiska nga P154 milyones nga balor sa drugas nga nasakmit gikan sa 1,056 ka operasyon.
Matud ni Sinas nga 570 ka tawo ang ilang nasikop diin 109 niini mga high value target ug 14 ka kilo nga drugas ug 584 ka kilo nga marijuana ang nasakmit sa maong mga operasyon. (BDB) (BANATNEWS)
- Latest
