Mga kawani sa MRF sa Lapu-Lapu gi-drug test

CEBU, Philippines —  Gipaubos  sa kinalit nga drug test ang 239  ka kawani sa kagamhanan sa Dakbayan  sa Lapu-Lapu  nga nadestino diha sa Material Recovery Facility (MRF)  nga nahimutang sa Sitio Soong sa Barangay Mactan sa maong dakbayan. Si  Gary Lao, pangulo sa  City of Lapu-Lapu Office of Substance Abuse Prevention (C-Losap)  nagkanayon nga  sa maong  gidaghanon nga ilang gipaubos  sa kinalit nga drug test ang walo niini wala makaapil tungod kay nipalta kini sa ilang trabaho. Matud ni  Lao nga ilang ipadayon ang pagpa-drug test karong adlawa  Oktubre 1, 2019  sa maong mga kawani  sa pagsiguro nga luwas sila sa paggamit sa ilegal nga drugas.

Si Lao nagkanayon nga kong ugaling mapakyas  gihapon sa pag-apil ang maong mga kawani karong adlawa  sa pagahimuong drug  test ilaha kining i-report ngadto kang Mayor  Junard  Ahong Chan alang sa pagahimuong aksiyon.

Nasayran nga  duha  ka kawani sa City   Traffic  Management System  (CTMS)  sa maong dakbayan nga napositibo ang resulta  sa paggamit sa ilegal nga drugas  ang hingpit nga gitangtang  sa ilang trabaho.

Si Chan nagkanayon nga ang  kawani nga regular,  casual o  mga job order  walay luna sa pagtrabaho  sa  kagamhanan  sa maong  dakbayan ubos  sa iyang administrasyon. (BDB) (BANATNEWS)